Ish-Prokurori i Përgjithshëm, Adriatik Llalla, ka kërkuar pezullimin e ekzekutimit të dënimit me 2 vite burg për fshehje pasurie. Kërkesa e Llallës erdhi një ditë pasi u shpall në kërkim ndërkombëtar. Bëhet me dije se kërkesën Llalla e ka bërë nëpërmjet avokatit të tij, teksa çështja është hedhur në short dhe pritet të shqyrtohet nga GJKKO. Sipas avokatit të Llallës, burgosja e tij do të sillte pasoja për jetën e ish-kryeprokurorit, pasi ai vuan nga një sëmundje e pashërueshme.
Ditën e djeshme, SPAK ka shpallur në kërkim ndërkombëtar ish-Kryeprokurorin e Përgjithshëm për akuzën e fshehjes së pasurisë. Llalla ishte larguar nga vendi dy javë përpara se Apeli i GJKKO-së të jepte dënimin e tij me dy vite burg, ndërkohë që policia kreu kontrolle në banesën e tij, ku gjeti vetëm bashkëshorten dhe djalin e mitur.
