Kompania Facebook është sërish në qendër të debateve. Një raport i fundit nga gazeta “Wall Street Journal” nxjerr në pah informacione të brendshme mbi efektet e dëmshme të platformës dhe ngurrimin e kompanisë për të vepruar. Një sinjalizuese, ish punonjëse e Facebook-ut, dëshmoi përpara Kongresit rreth dokumenteve të rrjedhura, se kompania ishte në dijeni të dëmeve të mundshme, që u shkaktonte Instragrami adoleshentëve.
Kompania Facebook, gjiganti i medias sociale, që ka nën pronësi edhe Instagramin dhe WatsApp-in, sërish ndodhet në qendër të vëmendjes.
“Jam këtu sot sepse besoj se produktet e Facebook-ut dëmtojnë fëmijët, nxisin përçarjet dhe dobësojnë demokracinë tonë",- tha Francez Haugen, ish- punonjëse e Facebook-ut.
Ajo kishte punuar për kompaninë Facebook për dy vite si menaxhere projektesh, por që atëherë është bërë e njohur si sinjalizuesja e kompanisë.
Të martën, zonja Haugen dëshmoi në një seancë në Senat rreth asaj, që ajo e cilëson si mungesë e qëllimshme veprimi dhe transparence nga kompania dhe aplikacionet e saj, siç është Instagrami.
Ajo tha se algoritmet e Facebook-ut kanë prirje të promovojnë gënjeshtrat para të vërtetave, duke përmendur fushatat e dezinformimit, që janë përhapur në ShBA dhe jashtë saj.
“Udhëheqja e kompanisë di si t’i bëjë Facebook-un dhe Instagram-in të sigurtë, por nuk do që t’i bëjë ndryshimet e nevojshme, sepse ajo vë fitimet para njerëzve”,- tha ajo.
Sipas studimit të vetë Facebook-ut, 32 për qind e vajzave adoleshente në Instagram thonë se kur ndiheshin keq për trupin e tyre, platforma i bënte të ndiheshin edhe më keq.
“Facebook-u e di se algoritmet, që mundësojnë shfaqjen e postimeve bazuar në aktivitetin e përdoruesit, mund t’i çojnë fëmijët me shpejtësi nga tema të padëmshme, si receta të shëndetshme ushqimi, në postime që promovojnë anoreksinë”, tha zonja Haugen.
Kompania Facebook thotë se zonja Haugen kishte qasje të kufizuar në hulumtimet dhe politikat vendim-marrëse të kompanisë.
Zyrtarja për sigurinë globale në Facebook foli para senatorëve javën që shkoi.
“A ka patur raste në studimet tuaja, kur një ndryshim në platformën e Facebook-ut mund të shkaktonte dëme tek përdoruesit, por ju e keni zbatuar gjithsesi, pasi ajo shton përdoruesit, ose fitimet”, pyeti Senatori Demokrat Ben Ray Lujan.
“Unë nuk kam përvojë të tillë në Facebook. Ne kujdesemi shumë për sigurinë e njerëzve në platformën tonë. Kemi investuar 12 miliardë dollarë në të, kemi mijëra e mijëra njerëz, që punojnë për këtë çështje. Kjo nuk është mënyra jonë e punës”,- u përgjigj Antigone Davis, drejtuese e sigurisë globale në Facebook.
“Ne e kemi dëgjuar Facebook-un në dëshmi dhe seanca duke thënë se ata do të bëjnë më të mirën, do të veprojnë ndryshe. Por pasi largohen asgjë nuk ndodh. Unë mendoj se kjo është hera e parë, që po dokumentohen gjërat për të cilat ata kishin informacione, gjërat që mund të ishin bërë, por nuk i bënë“, tha Shireen Mitchell, kritike e Facebook-ut.
Disa po e krahasojnë Facebook-un me momentet kritike ku e gjeti veten industria e cigareve…
“Facebook-u dhe teknologjia po përballen me momentin kritik të ngjashëm me atë kur mësuam se industria e duhanit e dinte se produktet e tyre shkaktonin kancer, por që ata i kishin fshehur dosjet e hulumtimeve”,- tha Senatori demokrat Richard Blumenthal.
Mbetet për t’u parë nëse ligjvënësit dhe rregullatorët do të veprojnë për të zvogëluar dëmin që pretendohet se shkaktohet nga Facebook. Ende nuk dihet se si do të reagojë kompania, edhe nëse thirrjet për ndryshim vijnë nga brenda.
