Dorëheqjet e vazhdueshme të titullarëve të hipotekës në Vlorë kanë tërhequr vazhdimisht vëmendjen e opinionit publik. Duket se një gjë e tillë ka sjellë dhe vonesat në dhënien e dokumenteve për qytetarët.
Përpara godinës së Kadastrës së Vlorës është krijuar një situatë kaotike, pasi shumë qytetarë që kanë prej kohësh problem janë mbledhur duke bërë thirrje. Shtetasi Mynyr Aliaj, tentoi të hipte dhe nga kangjellat ndërsa bërtiste me të madhe se i ka ardhur në majë të hundës me sorollatjet e institucionit.
“Pse na sjellin vërdallë, çfarë duan lëkurë apo para, lëkura jonë na ka ngelur. Kam 6 muaj me këtë punë vetëm për të marrë një dokument të vogël”, ka thënë qytetari Aliaj.
