Edevaldo Haxhiu është arrestuar nga policia shqiptare, pasi ka ndihmuar në arritjen e bosit turk të kriptomonedhës Faruk Fatih Ozer, njoftojnë mediat turke. Haxhiu është arrestuar në Tiranë pasi kishte ndihmuar Özer të strehohej në Shqipëri. Ai e kishte marrë atë nga aeroporti i Nënë Terezës, e kishte sjellë në hotel dhe e kishte ndihmuar të fshihej.
Mediat turke raportojnë se Haxhiu është arrestuar në orën 00:30 të mesnatës së sotme dhe theksojnë se ai është marrë në pyetje por ka mohur të ketë njohje me Faruk Fatih Ozer. Faruk Fatih Özer, u arratis nga Turqia në 20 prill dhe u strehua në Shqipëri. Më herët është vënë në pranga edhe shqiptari Altjan Canaj, që dyshohej gjithashtu se ndihmoi në të njëjtën arratisje.
Boss-i i kriptomonedhave turke erdhi në Shqipëri për t’iu fshehur autoriteteve turke. Ai akuzohet se përmes kompanisë së tij, Thodex, mashtroi mijëra turq që kanë investuar paratë e tyre, rreth 2 miliardë dollarë në monedhat virtuale. Më pas, ai shpalli falimentin e kompanisë, bëri mbylljen ebiznesit dhe u arratis.
