Për të mos përsëritur një edicion të Panairit të Librit, si ai i kaluari që u realizua online, kryetari i Shoqatës së Botuesve, Petrit Ymeri, kërkon që në edicionin e 24-të, botuesit të tregohen të përpiktë në ndjekjen e masave të nevojshme kundër përhapjes së COVID-19.
Ymeri u kërkon botuesve që të marrin masa për vaksinimin e të gjithë punonjësve apo të personelit që do të jenë në stendat apo ambientet e Panairit të Librit.
Këto masa do të shmangin riskun e përhapjes së virusit, si dhe do të bëjnë të mundur realizimin e një panairi pa problematika shoqëruese.
"Shoqata e Botuesve po punon shumë e angazhuar për të përgatitur dhe, në radhë të parë për të bërë të mundur, organizimin e Panairit të Librit në datat 17-21 nëntor në Pallatin e Kongreseve.
Sigurisht, duke njohur e vlerësuar shumë seriozisht situatën shëndetësore që po kalon Shqipëria, kemi menduar që ta bëjmë këtë aktivitet të realizueshëm duke zbatuar të gjitha rregullat dhe praktikat e ndjekura edhe në këtë periudhë.
Për këtë arsye kërkojmë nga të gjithë botuesit dhe librarët, të gjitha institucionet që do marrin pjesë në Panairin e Librit, që të marrin masa për vaksinimin e të gjithë punonjësve apo të personelit që do të jenë në stendat apo ambientet e Panairit të Librit, gjatë ditëve të aktivitetit apo ditëve përgatitore.
Për vizitorët do të ketë rregulla dhe kërkesa që do i vendosim në bazë të situatës dhe të porosive të organeve kompetente.
Të gjithë ekspozuesit do të dorëzojnë paraprakisht tek organizatorët e Panairit listat dhe dokumentacionin e duhur që vërteton vaksinimin e plotë me 2 doza.
Nuk do të lejohet asnjë subjekt apo person të marrë pjesë në Panair pa u vaksinuar.
Kundravajtësit do të gjobiten apo penalizohen në bazë të ligjeve apo rregullave në fuqi", shkruan kreu i Shoqatë së Botuesve, Petrit Ymeri.
