Lil Nas X i habiti të gjithë ditën e djeshme teksa publikoi disa foto të tij me barkun e rrumbullakosur. Sigurisht që reperi nuk është në pritje të ëmbël, por i përdori këto foto për të tërhequr vëmendjen e të gjithëve për publikimin e albumit të tij të ri.
Ai zbuloi se albumi me titullin “Montero”, do të publikohet në 17 shtator.
“Surprizë! Nuk mund ta besoj që më në fund po njoftoj këtë gjë. Pakoja ime e vogël e lumturisë “Montero” do të dalë në 17 shtator 2021”, shkroi reperi amerikan përkrah fotove të tij.
Ai tregoi për “People” se vendosi të realizonte këto foto pasi dëgjoi një varg të Megan Thee Stallion në këngën e saj të re “Dolla Sign Slime” për herë të parë.
“Në ato momente mendova ‘Oh Zot është e mrekullueshme’, kështu menjëherë telefonova stilisten time. Ajo më tha ‘Wow’, të gjitha do të vijnë bashkë. Albumi yt. Fëmija yt. Dhe unë thashë ‘Po, ky është fëmija im. Si një shaka, ajo më tha ‘Po, ti duhet të bësh një set fotografik shtatzënë’. Dhe unë i thashë ‘E di çfarë? Kjo është brilante. Tani kemi gjithë këtë gjë që do të publikohet dhe do të jetë e mrekullueshme”, tregoi reperi.
Mirëpo për këto foto, reperi u përball me një lumë kritikash nga fansa e ndjekës në rrjete sociale. Dikush i shkroi se njerëzit janë të lodhur prej tij dhe se është shumë i shëmtuar. Lil Nas X e mori me shumë sportivitet këtë koment, duke u përgjigjur: “Me të vërtetë ti po quan të shëmtuar një nënë të re?”.
Pasi ju përgjigj disa mesazheve negative, Lil Nas X shkroi në Twitter: “Më lejoni të dal offline, gjithë kjo energji negative nuk i bën mirë bebit”.
