Avioni me 121 qytetarë afganë, mes të cilëve 11 foshnja, ka mbërritur në orët e para të mëngjesit në aeroportin e Rinasit, ndërsa tashmë ata janë strehuar në Durrës, në ambientet e dy hoteleve. Ambienti i njërit prej tyre, hotel “Belvedere”, është i rrethuar me forca të shumta të policisë për të garantuar sigurinë e afganëve që do të qëndrojnë në Shqipëri. Në këtë hotel janë strehuar 60 afganë. Siç është theksuar, në hotel ka mjekë që do të kujdesen për shëndetin e afganëve, edhe sipas protokolleve për Covid-19, si dhe psikologë, nisur nga situata e rënduar prej nga ata vijnë.
