Kur Duka dhe Dukesha e Sussex njoftuan ardhjen në jetë të fëmijës së dytë - një vajzë - çifti zbuloi gjithashtu emrin e saj: Lilibet 'Lili' Diana Mountbatten-Windsor. Ashtu si me shumë emra në familjen mbretërore britanike, emri nderon paraardhësit dhe ka lidhje jo me një, por me dy gra me rëndësi të veçantë për Princin Harry.
Lilibet: Emri Lilibet mund të duket pak i pazakontë në pamje të parë. Emri është një dedikim për mbretëreshën, pasi me këtë emër e thërrisnin me përkëdheli brenda familjes.
Nofka daton që në fëmijëri, kur mbretëresha nuk ishte në gjendje të shqiptonte siç duhet emrin e saj. Bashkëshorti i mbretëreshës, princi Philip, i cili u nda nga jeta në prill, gjithashtu përdorte këtë emër për mbretëreshën.
Diana: Emri i dytë i foshnjës është Diana, zgjedhur për të nderuar kujtimin e gjyshes së ndjerë, Lady Diana.
Mountbatten-Windsor: Mbiemri Mountbatten-Windsor është mbiemri personal i zgjedhur nga shumë anëtarë të familjes. Ai është një kombinim i mbiemrit të mbretëreshës – Windsor – dhe emrit të familjes së princit Philip .
Vajza e çiftit Harry-Meghan, e teta në radhën për fron, do të njihet si Lili, një përpjekje për ta modernizuar pak emrin. Përpos kësaj, emri i referohet lules së zambakut që simbolizon pastërtinë.
Times of London raporton se Harry foli paraprakisht me gjyshen për të marrë miratimin në lidhje me emrin.
