Chiara Ferragni njoftoi pardje për 24 milionë ndjekësit e saj në Instagram se kishte marrë dozën e parë të vaksinës anti-Covid.
"Çfarë momenti emocionues. Dukej shumë larg, por më në fund ndodhi," –shkroi ajo.
Influencerja u vaksinua më 2 qershor dhe ndau foto nga momenti kur po vaksinohej, por postimet e saj të mëvonshme shkaktuan polemika dhe kritika.
Menjëherë pas vaksinimit, Chiara Ferragni ndau disa video me ndjekësit e saj në Instagram, ku foli për emocionin që ndjeu:
"Siç e keni parë nga postimi, unë kam bërë vaksinën dhe jam jashtëzakonisht e lumtur, sepse duket se shoh një dritë në fund të tunelit pas një viti e gjysmë, i cili na është vjedhur,” –tha ajo, duke e quajtur vaksinimin si të vetmen rrugëdalje nga një makth.
Mes shumë postimesh ajo ndau edhe videon që tregon leukoplastin që punonjësit e shëndetësisë i vendosën pas injeksionit në krahun e saj të majtë. Por në videot në makinë pas vaksinës, leukoplasti duket në krahun e djathtë. Pikërisht ky detaj, që nuk ka kaluar pa u vërejtur nga ndjekësit e vëmendshëm, ka shkaktuar polemika dhe akuza. Shumë e akuzuan Chiara-n se po promovon vaksinat, ndërsa të tjerët vunë në dyshim vërtetësinë e vaksinimit të saj.
Pas akuzave në rrjet, Chiara i është drejtuar sërish Instagramit për të sqaruar gjithçka.
"Ndihem krejtësisht normale. Më vjen për të qeshur që kaq shumë teoricienë konspirativë kanë menduar se kam gënjyer për vaksinën. Sepse në video leukoplasti dukej në krahun tjetër. E bëra në krahun e majtë dhe kamera kur e përdor nga përpara kthen imazhin", -tha ajo duke sqaruar se në një rast është përdorur kamera e pasme dhe në rastin tjetër, në makinë, ajo para.
