Presidentja e Kosovës, Vjosa Osmani ka falënderuar ditën e sotme homologun e saj amerikan Joe Biden për vaksinat që SHBA do të ndajë për Kosovën.
Përmes një postimi në rrjete sociale, Osmani shkruan se ka kërkuar nga presidenti amerikan Joe Biden, më 19 mars, që SHBA-ja të mbështesë Kosovën me vaksina.
Presidentja e Kosovës shpreh mirënjohje për Presidentin, duke shkruar se ky i fundit ka qenë gjithmonë një mik i Kosovës dhe se me këtë akt Biden dhe SHBA-ja tregojnë edhe njëherë se janë aleatë historikë të Kosovës.
Postimi i plotë i Presidentes Osmani:
PRESIDENTI BIDEN NDANË VAKSINA PËR KOSOVËN
Më 19 mars 2021, i kam shkruar Presidentit Biden duke kërkuar mbështetjen e Shteteve të Bashkuara për dhurimin e vaksinave në kohën kur Kosova ishte i vetmi shtet në Evropë që ende nuk kishte filluar administrimin e tyre. Më 19 Prill 2021 Presidenti Biden u përgjigj pozitivisht në të cilën ai u zotua për ta trajtuar kërkesën tonë rreth vaksinave. Sot, ne jemi të lumtur të njoftojmë se Presidenti Biden, në emër të SHBA-ve, ka vendosur të dhurojë një numër të rëndësishëm të vaksinave COVID-19 për Republikën e Kosovës.
Dua të shpreh mirënjohjen time më të thellë për Presidentin Biden për këtë gjest bujar dhe për dhurimin e vaksinave COVID-19 për Republikën e Kosovës pas kërkesës së adresuar atij në muajin mars. Njoftimi zyrtar i sotëm është tjetër dëshmi e mbështetjes së palëkundur që vendi ynë e gëzon historikisht nga Shtetet e Bashkuara të Amerikës.
Presidenti Biden ka qenë gjithmonë mik i Kosovës dhe ky donacion ilustron kujdesin dhe konsideratën e pakursyer që ai vazhdon të tregojë ndaj popullit tonë. Në emër të qytetarëve të Republikës së Kosovës e falënderoj përzemërsisht.
Kosova dhe institucionet tona vazhdojnë të mbeten të palëkundura në orientimin Euro-Atlantik dhe të njëjtën politikë e kanë ndjekur edhe në sigurimin e vaksinave.
Zoti e bekoftë Kosovën dhe aleatin tonë, Shtetet e Bashkuara të Amerikës.
Aktualisht Kosova po imunizon popullatën e vet me vaksina të siguruara nga programi COVAX i Organizatës Botërore të Shëndetësisë, që synon të ndajë vaksina për vendet e varfra, si dhe nga donacionet e Bashkimit Evropian për Ballkanin Përëndimor.
Më 28 maj, ministri i Shëndetësisë Arben Vitia ka thënë se Kosova pret që deri në fund të vitit të pranojë 1.213.290 doza të vaksinës së kompanisë Pfizer.
Megjithatë, nuk është bërë e ditur data e saktë e arritjes së këtyre dozave në Kosovë.
