Lëvizja Vetëvendosje dega në Shqipëri ka njoftuar se ka dorëzuar në Kolegjin Zgjedhor një padi ndaj vendimit të KAS për pavlefshmërinë e zgjedhjeve në Qarkun Gjirokastër.
“Kreshnik Merxhani në cilësinë kandidatit nga zgjedhësit në Qarkun e Gjirokastrës në zgjedhjet e 25 prillit, dorëzoi në Kolegjin Zgjedhor Gjyqësor padinë për të kundërshtuar vendimin e KAS.
Ky vendim rrëzonte ankesën tonë mbështetur mbi faktet e parregullsive dhe manipulimit të procesit zgjedhor si dhe një sërë veprash penale të konstatuara, për pavlefshmërinë e zgjedhjeve në këtë qark dhe përsëritjen e tyre.
Seanca në Kolegjin Zgjedhor për padinë e Kreshnik Merxhanit do të mbahet ditën e hënë, më 31 maj 2021, ora 10:00. Përpjekjet tona për të bërë publik dhe denoncuar çdo krim elektoral nuk do të ndalen dhe së bashku me to edhe kërkesa për ndëshkimin e fajtorëve dhe vendosjen e drejtësisë” – thuhet në njoftimin e Vetëvendosjes.
Më herët KAS i rrëzoi pretendimet e Vetëvendosjes për të shpallur të pavlefshme zgjedhjet në Gjirokastër edhe pse kjo forcë paraqiti një sërë provash për një rezultat të deformuar. ©LAPSI.al
