Dy të rinj nga Lushnja janë arrestuar nga Policia e Fierit dhe ajo e Durrësit pas disa muajsh hetime për shpërndarje të drogës. Ata janë K.T, 26 vjeç dhe S.T, 20 vjeç, banues në Lushnjë. Gjithashtu u bë shpallja në kërkim e shtetasit L. S., banues në Lushnjë.
Drejtoria Vendore e Policisë Durrës bashkëpunoi me Drejtorinë Vendore të Policisë Fier nën drejtimin e Prokurorisë së Durrësit kundër grupit kriminal që shpërndante lëndë narkotike, veprimtari kriminale e shtrirë në Durrës, Lushnjë dhe Tiranë.
Policia njoftoi se "u vunë në pranga 2 nga pjesëtarët e këtij grupi dhe u shpall në kërkim bashkëpunëtori i tyre, i cili gjatë kontrollit nga shërbimet e Policisë nuk u gjend në banesë. Në vitin 2020, në nisjen e operacionit qenë arrestuar në flagrancë edhe 2 prej pjestarëve të tjerë të këtij grupi.
Specialistët për Hetimin e Narkotikëve Durrës në bashkëpunim me specialistët e DVP Fier, nën drejtimin e Prokurorisë së Rrethit Gjyqësor Durrës, pas një pune hetimore disamujore finalizuan kështu me sukses operacionin e koduar "Trinomi".
Për “Prodhim dhe shitje të lëndëve narkotike” kryer në bashkëpunim u bë ekzekutimi i urdhrave të ndalimit të nxjerra nga Prokuroria Durrës, në ngarkim të dy shtetasve të tjerë:K. T., 26 vjeç dhe S. T., 20 vjeç, banues në Lushnjë. Gjithashtu u bë shpallja në kërkim e shtetasit L. S., banues në Lushnjë.
Procedimi penal nisi në tetor 2020, kur u arrestuan M. R. dhe J.B., banues në Tiranë, pasi tek Mbikalimi i Plepave, gjatë kontrollit në mjetin tip “Opel” me drejtues shtetasin M. R, në bagazh është gjetur cannabis sativa. Nga hetimet disamujore të kryera doli se ata në bashkëpunim me njëri-tjetrin, ushtronin veprimtarinë kriminale të shitjes së lëndëve narkotike me klientë të ndryshëm në qytetin e Durrësit, Tiranës dhe Lushnjës.
Vijon puna për identifikimin dhe kapjen e personave të tjerë të implikuar në këtë veprimtari".
