Mbetet e mbuluar nga misteri vdekja e një të riu shqiptar në një bodrum të mbushur me bimë kanabisi në Sheffield të Britanisë së Madhe. Trupi i 32-vjeçarit Adriatik Balliu u gjet në 12 korrik të vitit të kaluar brenda një shtëpie në Rockley Road pasi ai u denoncua i zhdukur nga gruaja e tij që nuk e shihte prej 2 ditësh.
Pas informacioneve të gruas së tij policia gjeti trupin e pajetë në fund të shkallëve të një bodrumi. Brenda tij kishte 88 bimë kanabis. Balliu ishte zhvendosur nga Shqipëria në Britaninë e Madhe me gruan e tij në mars 2019.
Ai kishte një vajzë të vogël kur humbi punën në një lavazh për shkak të pandemisë. Gruaja dëshmoi se ai ishte i stresuar për shkak se babai i tij ishte i sëmurë në Shqipëri dhe për këtë arsye nisi një punë tjetër në fshehtësi.
"Në të vërtetë ai nuk foli kurrë për atë punë që bënte me gruan e tij. Ajo ishte e vetëdijshme se ai po bënte diçka në lidhje me drogën pasi ai vinte në shtëpi me erë kanabisi" – tha prokurorja e çështjes. Policia nuk gjeti asnjë arsye, rrethanë të dyshimtë ose përfshirje të ndonjë pale të tretë në vdekjen e tij. ©LAPSI.al
