Prokuroria e Elbasanit reagoi për herë të parë mbrëmjen e së mërkurës për ngjarjen e rëndë të 24 orëve më parë kur në këtë qytet u ekzekutua 41-vjeçari Everest Çaka. Me një fjalit të shpërndarë për mediat nënvizohet se viktima “nuk është marrë në pyetje nga autoritetet belge gjate kohës së kryerjes së veprimeve të tyre në Prokurorinë e Elbasanit”.
Bëhet fjalë për një grup prokurorësh belgë që mbërritën në këtë qytet pak javë më parë të cilët interesoheshin për vrasjen e Arjan Spahiut, kushëri i Everest Çakës. Spahiu u ekzekutua në një atentat në Bruksel në 28 nëntor të vitit të kaluar.
Përveç këtij njoftimi të shkurtër prokurorët e Elbasanit kanë qenë hermetikë në dhënien e informacioneve. Mësohet se janë thirrur mbi 25 persona për tu pyetur, por asnjë nuk është ndaluar pas dhënies së dëshmive. Pistat ku po hetohen mbeten ato të hakmarrjes apo e prishjes së pazareve të aktiviteteve të paligjshme.
Viktimës i kanë vrarë edhe një vëlla vite më parë në Spanjë. Dosjet e hapura janë të shumta. Është hapur edhe vrasja e Gëzim Alikajt në Elbasan, ngjarje e ndodhur në vitin 2010. Hetuesit kanë sekuestruar edhe kamera të shumta sigurie në zonë në përpjekje për të zbuluar më shumë detaje për ngjarjen. Dëshmitarja kryesore e ngjarjes është bashkëshortja e të ndjerit, Silvana Çaka, e cila duket se nuk ka dhënë shumë detaje në lidhje me vrasësit.
“Sapo makina jonë nisi lëvizjen, një mjet na goditi nga pas, kujtuam se ishte aksident. Pashë një burrë që u afrua tek xhami i shoferit dhe mbante në duar një armë. Ai qëlloi disa herë në drejtim të Everesit, në qafë dhe në gjoks. Një plumb më goditi në krah”, - tha ajo.
Autorët kanë përdorur një armë me silenciator pasi në zonë nuk janë dëgjuar të shtëna. Makina e autorëve u gjet e djegur në një fshat në Golem të Kavajës. Mënyra e organizimit të vrasjes hedh dyshime të forta për hetuesit se bëhet fjalë për vrasës me pagesë. ©LAPSI.al
