Edi Rama nuk e priti mirë shkrimin e gazetës austriake Der Standardat, në të cilin për atë thuhet se kishte parë një dokument të fshehtë jo-formal (non-paper) europian që propozonte ndryshimet e kufirit mes Kosovës dhe Serbisë, dhe se ai me Vuçiçin miratuan vizatimin e kufijve të rinj përgjatë vijave entike.
Rama e quan të turpshëm shkrimin (kliko këtu për shkrimin origjinal), dhe Der Standardat-in një përhapës të lajmeve të rreme.
"@derStandardat Çfarë zhgënjimi të shohësh një gazetë me kaq reputacion të lartë të sillet si një përhapës i lajmeve të rreme!
Unë kurrë nuk kam thënë ndonjë gjë në lidhje me “non paper dhe hartë” dhe kurrë nuk kam mbështetur ndonjë ndryshim të kufijve etnikë midis Serbisë & Kosovës! # Turpëruese." - shkroi Rama në Tëitter.
Përgënjështrimi i Ramës vjen në përgjigje të një shkrimi të datës 27 prill, ku gazeta prestigjoze austriake theksonte se “Kryeministri shqiptar Edi Rama i tha mediave në Shqipëri se ai e kishte parë "non-paper" dhe hartën me ndryshimet e propozuara të kufirit. Vetë Rama, së bashku me Vuçiç dhe lobistë, miratuan vizatimin e kufijve përgjatë vijave etnike midis Kosovës dhe Serbisë tre vjet më parë”.
Çfarë janë "non paper" dhe si përfshihet Rama
“Non-paper”, në gjuhën e institucioneve evropiane është një dokument jo-formal që ekspozohet në negociata të mbyllura brenda institucioneve të BE-së, veçanërisht në Këshillin e Ministrave. "Non-papers" përdoren në mënyrë që të kërkohet marrëveshja për ndonjë çështje të kontestuar në BE.
Në media janë publikuar dy dokumente të pretenduara se janë “non-paper” të BE-së, në të cilat flitet për qasje të ndryshme për zgjidhjen e kontestit Kosovë-Serbi. Njëra mban datën 15 prill, tjetra 27 prill.
“Non-paperi” i parë, i datës 15 prill, pretendohet të jetë i kryeministrit të Sllovenisë, Janez Jansha, i dërguar për çështjen për Këshillin e Evropës. "Non-paperi" përmban çka mund të quhet si propozimi për ricaktimin e kufijve në Ballkanin Perëndimor, si një mënyrë për të zgjidhur problemin territorial ndërmjet gjashtë vendeve të Ballkanit.
(Në foto: kryeministri slloven, Janez Jansha)
Kryeministri i Sllovenisë nuk vonoi ti hidhte poshtë këto pretendime. Edhe zyrtarë të lartë të BE-së bënë të njëjtën gjë.
Më 27 prill, "Koha Ditorë" në Kosovë dhe disa media të tjera kanë publikuar një “non-paper” tjetër.
Në këtë dokument jo-formal, i cili është pretenduar të jetë hartuar nga Gjermania dhe Franca, flitet për themelimin e të ashtuquajturit “distriktit autonom të Kosovës së Veriut” dhe për njohjen e integritetit dhe sovranitetit territorial mes Kosovës dhe Serbisë. Thënë ndryshe një njohje e ndërsjellë mes dy shteteve.
Gjermania gjithashtu e hodhi poshtë vërtetësinë e këtij “non-paperi".
Të enjten, pas takimit me kryeministrin kosovar Albin Kurti, në Bruksel, i pyetur lidhur me këto dokumente, Përfaqësuesi i Lartë për Politikë të Jashtme dhe Siguri i Bashkimit Evropian, Josep Borrell tha se ai nuk punon me "non paper" dhe i quajti aot "dokumente fantazmë".
Serbët, pala që i intereson
Pavarësisht se këto "non-papers" u hodhën poshtë nga çdokush i përmendur në shkrime, Aleksandër Vuçiç ndjek një tjetër linjë.
Më 27 prill, Presidenti i Serbisë tha se “non-paper” i publikuar nga mediat në Prishtinë, është bërë nga dikush që është “shumë shumë i mençur”.
“Ka gjëra të cilat do iu kishin pëlqyer serbëve, por aty është edhe një gjë, të pranohet pavarësia e Kosovës, e që është shumë e keqe për serbët”, deklaroi Vuçiç gjatë një vizitë në jug të Serbisë, duke shtuar spekulimet pasi tha edhe se publikimi nuk është bërë pa arsye.
Presidenti serb deklaroi se për Serbinë është e papranueshme njohja e pavarësisë së Kosovës, por megjithatë, tha se do t’i analizojë porositë për palën serbe dhe palën Kosovare. ©LAPSI.AL
