Tirana u shndërrua në fushë-beteje mes qindra të rinjve që dolën në protestë për të kërkuar drejtësi për Klodian Rashën dhe forcave speciale të policisë që për natën e pestë rresht kanë arrestuar qindra të rinj, shumë prej të cilëve të mitur.
Tubimi nisi i qetë në sheshin Skëndërbej dhe vazhdoi pa incidente deri tek kryeministria, ku të rinjtë janë shtrirë në tokë dhe kanë vënë duart pas kokës, në shenjë proteste për vrasjen e 25-vjeçarit që tronditi opinionin. Përplasjet kanë nisur pranë Drejtorisë së Tiranës, pikërisht pranë urës së Lanës, kur protestuesit janë përplasur me Forcat e Ndërhyrjes së Shpejtë.
Në momentin kur protestuesit janë afruar dhe kanë hedhur gurë, policia është kundërpërgjigjur me gaz lotsjellës, duke shpërndarë turmën. Për më shumë se një orë, në të gjithë Tiranën janë arrestuar dhjetëra apo qindra të rinj. Fotot më poshtë japin një panoramë më të qartë të asaj që ka ndodhur.
Protestuesit marshojnë në bulevardin Dëshmorët e Kombit drejt Kryeministrisë
Protestues të shtrirë para kryeministrisë me duart në kokë
Nga kryeministria, protestuesit i drejtohen godinës së Drejtorisë së Policisë
Protesta ndalet pranë urës, në krah të Drejtorisë së Policisë së Tiranës
Protestuesit tentojnë të kalojnë urën dhe i afrohen kordonit të policisë
Policia përgjigjet me gaz lotsjellës
Para ndërhyrjes, një pjesë e protestuesve vazhdojnë të rezistojnë
Protestues i shtrirë në tokë ndërsa FNSH nis të përparojë me shkopat e gomës
Protestuesit nisin të shpërndahen në rrugët dytësore
Nisin arrestimet në të gjithë Tiranën
Policët shoqërojnë këdo që ishte pjesë e tubimit
Një nga pankartat që nxorri në protestë të rinjtë
