Dua Lipa ka bashkuar forcat me artisten nga Belgjika, Angèle, për këngën e re “Fever”. Dua publikoi albumin e saj të dytë “Future Nostalgia” në fillim të këtij viti.Teksa javën e kaluar kënga erdhi në versionin ‘lyrics’, ditën e sotme është publikuar edhe videoklipi i saj.Dy vajzat plotësojnë mjaft mirë njëra-tjetrën, teksa vargjet dhe zërat e artisteve ndërthuren midis rreshtave mbi një ritëm joshës, me timbrat e tyre të veçantë që plotësojnë me mjeshtëri tekstin romantik.
“Unë kam temperaturë / Kështu mund të më kontrollosh? Ma vendos dorën në ballë / Më puth në qaf / Kur ti më prek, zemër, unë bëhem e kuqe”-thuhet në refren.
Ky është debutimi i parë zyrtar i Angèle për audiencat anglishtfolëse, megjithëse ajo është një yll për botën frëngjishtfolëse.
Pas publikimit të Future Nostalgia, Lipa bashkoi forcat me Blessed Madonna për të krijuar një album unik remix të quajtur Club Future Nostalgia.
Ai përmban remix të reja të këngëve të Future Nostalgia të bëra nga DJ dhe prodhuesit më në zë, duke përfshirë Mark Ronson, Horse Meat Disco, Mr. Fingers etj. Strukturuar si një miks i gjatë DJ, LP paraqiti shembuj të këngëve nga Stevie Nicks, Neneh Cherry dhe Jamiroquai, ndër të tjera.
“Future Nostalgia” duket se ia ka dalë të triumfojë brenda pak kohësh, teksa për javë të tëra ka qëndruar në vend të parë, si albumi më i dëgjuar në Britani.
Kujtojmë se po ashtu Dua është nominuar për “Mercury Prize”, një nga çmimet më të rëndësishme në Britani që vlerëson albumin më të mirë, duke u bërë artistja e parë shqiptare që nominohet për një çmim të tillë.
Ndërkohë, më 26 nëntor Dua do të mbajë një koncert virtual, për të ardhur sa më pranë fansave të saj.
Ajo do të interpretojë live ndërsa ky “koncert” do të titullohet “Studio 2054”. Pritet që ajo t’i ndërrojë kostumet dhe skenat ku do të performojë. Gjatë performancave Dua do të shoqërohet nga disa muzikantë, balerinë, akrobatë të ndryshëm, dhe të ftuar specialë, identiteti i të cilëve po mbahet i fshehtë.
Jam shumë e emocionuar se nuk pata mundësinë të zhvilloja turin e planifikuar këtë vit. Dhe është paksa e veçantë, si një opsion për këto kohë. Më duket më shumë si një emision televiziv i imi.- ka thënë ajo dje në emisionin e Jimmy Fallon.
