Nuk ishin pak banorët e Dajtit që morën pjesë në takimin e organizuar nga vëllezërit Qefalia ditën e shtunë në ambjentet e jashtme të një prej restoranteve të zonës. Përballë banorëve, ulur Erion Veliaj, Ervin Bushati, Xhemal Qefalia dhe gazetarja Iva Tiço.
Në sfond, qyteti i fshehur pas një reje pluhuri, që mjegullon çdo ditë mbi banorët. Ngjyrat e shtëpive dhe pallateve aty pranë duken më qartë. Të tjerat, pak më larg shkrihen me bardhësinë e pluhurit, derisa ky bëhet njësh me vijën e horizontit. 
Veliaj foli për babain dhe nënën e tij nga Berati dhe Vlora. Foli për themelimin e MJAFT-it, për tymin e Sharrës para inceneratorëve dhe për akuzat ndaj kundërshtarëve politikë, por për smogun e Tiranës nuk tha asgjë. Prej kohësh, e ka braktisur Bashkinë dhe ka marrë përsipër të udhëheqë fushatën e Partisë Socialiste, si Drejtues Politik i saj.
Pikërisht si Drejtues politik zgjodhi takimin e Dajtit për të paralajmëruar se shumë shpejt “për pak ditë” tha ai, do të ketë 5 parti të reja të opozitës. Veliaj e shoqëroi këtë me akuzën se opozitën nuk është për t'i besuar, se kur ajo nuk po arrin të mbajë dot bashkë as familjen e vet... Ndërkohë sillte si shembullin më të mirë, faktin që Partia Socialiste në këto zgjedhje hyn e vetme. Video më poshtë:
https://www.youtube.com/watch?v=bxVH8QCxvZE&feature=youtu.be
Në fakt, të qënit e vetmuar në këto zgjedhje, është dobësia më e madhe e Partisë Socialiste dhe ky handikap po i jep formë të gjithë lojës politike për zgjedhjet e 25 Prillit. Në fillim me forcën e ligjit, kur Edi Rama ndryshoi Kushtetutën, për të ndaluar me ligj koalicionet parazgjedhore. Dhe pikërisht se Partia Socialiste hyn e vetme në zgjedhje, i intereson krijimi i sa më shumë partive të reja opozitare për të krijuar kakofoninë dhe për të mbjellë përçarjen mes kundërshtarëve.
Natyrisht që asnjë parti e re që del në skenë nuk ka pse të paragjykohet mes opozitës, por dalja e Erion Veliajt si lajmëtari i tyre që në gjenezë ngre pikëpyetje të forta mbi besueshmërinë e këtyre forcave që do të krijohen.
Ne taktikën e sponsorizimit të partive të reja, si Veliaj ashtu edhe Rama kane eksperiencën e G99, një parti që u krijua për zgjedhjet e 2009 dhe pasi nuk mori asnjë deputet, u mbyll, në stilin e ndërmarrjeve qe kanë qëllime afatshkurtra përfitimi.
Paralajmërimi i Veliajt mund të jetë edhe pjesë e lojës për të mbjellë përçarjen në kampin e kundërshtarëve politikë. Lapsi.al ka trajtuar me imtësi rolin që i është ngarkuar Veliajt në këtë fushatë, si njeriu që i është dashur të zhvishet nga manteli i djalit punëtor që inspekton kopshte dhe lulishte, për të degraduar në rolin e politikanit që i fryn zjarrit të përplasjes, sulmeve ndaj kundërshtarit dhe diversioneve të ulta.
Lexo edhe: Spiropalizimi i Erion Velisë
Por ndërsa të gjitha këto mbeten në vorbullën e lojërave dhe intrigës politike, ajo që duhet të kuptojnë 1 milion qytetarët e Tiranës është se për këto 6 muaj posti i Kryetarit të Bashkisë së Tiranës do jetë bosh. Sepse kryetari ka një tjetër dashuri më të madhe se Tirana e mbuluar nga pluhuri; është dashuria për Partinë.©Lapsi.al
