Në vitin 2016 një lajm, në formë thashethemi, filloi të qarkullonte online në lidhje me një ngjarje të ndodhur mes Princeshës Beatrice dhe këngëtarit Ed Sheeran. Asokohe thuhej se princesha kishte plagosur Ed pa dashje në fytyrë me një shpatë ceremoniale. Thuhej se Beatrice po tallej me James Blunt në një party në Windsor, por shpata aksidentalisht preku Ed.
Megjithatë kjo ngjarje duket se mbeti në harresë për të gjithë, por jo për menaxherin e këngëtarit, Stuart Camp. Stuart e risolli çështjen në vëmendje në podcastin Straight Up, ku tregoi se ndodhia ishte e vërtetë, por u ishte kërkuar të mos tregonin në publik se e bëri Beatrice:
“Unë u bëra mjaft protektiv për këtë çështje, sepse asnjëherë nuk e kemi komentuar publikisht. Disa njerëz thanë: 'Oh, ju duhet të gënjeni dhe të thoni se nuk ishte ajo dhe të thoni se ishte dikush tjetër.' Unë thashë, 'mirë, ne nuk po i themi askujt asgjë. Unë nuk gënjej, vetëm sepse dikush është aq idiote sa të luajë me një shpatë kur të gjithë janë të dehur. Nuk është e sigurt!’”, -u shpreh Camp.Rikujtojmë që James Blunt u përpoq ta mohonte këtë gjë në vitin 2017, kur u bë publike në media, duke i thënë Shortlistit se "Ed ishte i dehur, po luante dhe preu veten".
