Nëse ka ndonjë serial që po zëvendëson denjësisht suksesin e “Game of Thrones” për HBO është padyshim “Succession”. Në ceremoninë e këtij viti seriali u vlerësua për aktrimin, regjinë, skenarin dhe dramën më të mirë.
“Succession” ndjek jetën e Logan Roy (i luajtur nga Brian Cox), CEO në moshë të thyer i Waystar Royco, kompani e madhe mediatike dhe argëtuese, dhe të katër fëmijëve të tij – tre prej të cilëve dëshirojnë me patjetër t’i zënë vendin. Ka diçka të pazakontë në “Succession”. Nga një anë ka fansa të zjarrtë dhe nga ana tjetër, askush prej tyre nuk i pëlqen personazhet. Përpara se të nisni serialin, duhet të përshtasni trurin me tonin e tij – cinik dhe të hidhur. Anëtarët e familjes Roy abuzojnë verbalisht me njëri-tjetrin. Ata janë dinakë. Kanë një sens të errët humori dhe personazhet janë të tillë: i urren po aq sa dëshiron t’i shohësh. Ata nuk kujdesen për njëri-tjetrin ose për punonjësit e kompanisë dhe e përqëndrojnë vëmendjen e tyre te paratë, karriera, pushteti dhe janë të aftë të mbulojnë çdo skandal mediatik.
Aktori Matthew Macfadyen (Tom Wambsgans) e shpjegon serialin kështu: “Është si film me superheronj, vetëm më i mirë. Ti mund të bësh çfarë të duash. Autoritetet nuk të prekin. Ti vesh një kostum, i cili është i dizenjuar nga Armani.” "Succession", i krijuar nga Jesse Armstrong, pati premierën në HBO në qershor të vitit 2018. Në gusht-tetor të 2019-s u transmetua sezoni i dytë. Në prapaskenat e Emmy Awards, Armstrong u shpreh se produksioni me gjasë do të nisë punën për sezonin e tretë këtë vjeshtë-dimër.
