Si në intervistën e Lulzim Bashës në studion e Opinion, ashtu edhe në konferencën e Ilir Metës nga oborri i presidencës, këto ditë ra në sy një dozë e shtuar kërcënimesh direkt ndaj Edi Ramës, thuajse në kufijtë e shantazhit.
Kreu i PD paralajmëroi burgosjen e Ramës pas zgjedhjeve, kur u zotua për “përgjegjësi penale” duke përmendur nominalisht Ramën dhe më pas “ministrat e tij”, se do të përgjigjen për korrupsionin galopant që vënë në dukje raportet ndërkombëtare. Basha riktheu edhe një klishe të ndërkombëtarëve, atë se “kultura e pandëshkueshmërisë duhet të marrë fund”, sipas tij me Edi Ramën.
Me të njëjtën llogjikë kërcënuese ishte edhe presidenti Meta, që bënte krahasimin mes Ramës dhe Lukashenkon, ndërsa fliste për rrëzimin që e pret atë që do të tentojë të cënojë zgjedhjet. Duke i kërkuar t’i mbajë duart larg nga votat e 25 Prillit, Meta tha se “vrima e miut do t’i duket e vogël” dhe se “grusht i shtetit do të marrë përgjigje nga grushti i popullit”.
6 muaj para ditës së zgjedhjeve, është e kuptueshme se gjuha e drejtpërdrejtë e kërcënimeve bombastike sapo ka filluar. Por ajo që e bën opozitën të kalojë në revansh që tani, është fakti se Edi Rama nuk arriti ta fshehë dot shqetësimin për një humbje të mundshme në 25 Prill dhe faktin se rezultati fitues i 4 viteve më parë kur mori 74 mandate i duket i pamundur.
Simptoma e parë e panikut u reflektua në atë që Lapsi.al e konsideroi fjalimi më pesimist i mbajtur ndonjëherë nga kryesocialisti. Ai u tha të vetëve se nëse votimet kryheshin sot, atëherë “PS nuk do t’i fitonte dot zemrat e të gjithë atyre që s’kanë votuar kurrë për kundërshtarët e saj”, apo se “ne do te merrnim më pak vota sesa e meritojmë për punet që kemi berë për Shqipërinë”. Mungesa e entuziasmit në këtë fjalim nuk ishte shenja e parë që u dhuroi Rama kundërshtarëve.
Ndryshimi i Kushtetutes në mënyrë të njëanshme me qëllimin e vetëm për ta përçarë një koalicion PD-LSI dhe në veçanti ngutja me të cilën u veprua: duke prishur konsensusin e arritur me opozitën, në shpërfillje të këshillave të ndërkombëtarëve dhe me konsultime online të ekspertëve në kohë pandemie, i dhanë këtij akti ngjyrat e një vendimi të marrë nën presion, që i shkon për shtat shprehjes së njohur të cilën Rama ia kujtonte Berishës në fund të mandatit të dytë, kur i kujtonte se “njerëzit e dëshpëruar, kryejnë akte të dëshpëruara”.
Një tjetër shenjë se rezultati i zgjedhjeve në 25 prill nuk do të jetë i kënaqshëm, nuk ka si të mos jenë artikulimet e mediave pranë qeverisë, që kanë nisur të qarkullojnë sërish idenë e një koalicioni me bazë të gjerë pas zgjedhjeve mes PD dhe PS.
Dhe pikërisht pse frika e humbjes tek Rama është e lexueshme tashmë jo vetëm në artikulim, por edhe në aksionin politik, të dy, si Basha, ashtu dhe Meta po e shohin që mënyra më e mirë për t’ia nxjerrë në pah simptomat e panikut, është t'i shtojnë kërcënimet dhe shantazhin për atë që e pret në 26 prill.©Lapsi.al
