Ditën e sotme, qeveria ka marrë masa të ashpra për të luftuar përhapjen e COVID-19, dhe ka vendosur të ndalojë hapjen e klubeve të natës, diskove dhe Lounge Bareve apo shërbimeve të ngjashme si në ambiente të hapura ashtu edhe në ato të mbyllura. Në rast shkelje të këtij vendimi bizneset do të dënohen me 30 milionë lekë të vjetër gjobë dhe me pezullim të aktivitetit deri në 1 vit. Personazhe të njohur të showbiz-it kanë reaguar lidhur me këto masa, shumica prej të cilëve duket se s’kanë qenë dakord me këtë vendim. Moderatorja Xhemi Shehu s’ka vonuar të reagojë në InstaStory, duke ironizuar me humor masat e qeverisë.
“Po dëgjoi corona muzikë pas orës 20:00, të mbyti, sidomos nëse je duke pirë e s’je në restorant.”- shkruan moderatorja në postim.
Gjithashtu këngëtari i njohur Elton Deda tregoi pak më parë se ka gjetur “zgjidhjen perfekte” për këngëtarët e muzikës live.
“Kevin Kaceli sapo më dha nje mendim te vyer. Ne muzikantet, ti bejme Live-t tona nga ora 8 e mëngjesit deri ne 10. Në këtë mënyrë shijohet kafja e mëngjesit përsëmbari. Faleminderit të gjithëve që do na mbështesni në këto orare.”- shkroi ai në një postim në Facebook.
