Po të dëgjosh argumentet e kryeministrit të gjitha janë kundër Tribunalit
të Hagës, por qëndrimin e ka pro tij
Edi Rama është shfaqur të enjten i revoltuar, me tone të larta dhe me argumenta populiste për të komentuar vendimin e Gjykatës Speciale për Thaçin dhe Veselin, në një qasje që i ngjante si dy pika uji, asaj që mbajti kur Saimir Tahiri doli në përgjimet italiane.
Edhe fjalimi në parlament (video poshte) edhe intervista që dha në mbrëmje në Klan Kosova u karakterizuan nga e njëjta linjë, që kryeministri shqiptar mban kur nuk ka një qëndrim të prerë: ai përdor një gjuhë të dyfishtë, tregon me gisht të zezën, por edhe të kundërtën e saj, formon fjali stilistikisht të ndërlikuara, po ku është e vështirë të gjesh thelbin.
Kjo kontradiktë u pa edhe në reagimin e Ramës në mbrojte të presidentit të Kosovës dhe ish kreut të kuvendit.
Ai solli një sërë shembujsh dhe argumentash se si këta drejtues së shtetit kishin qenë pro ngritjes së Gjykatës Speciale, se si e kishin përkrahur dhe votuar atë, se si vetë, Rama kishte qenë pro atij tribuanali në Hagë.
Por, nga ana tjetër ai shtjelloi një sërë argumentash se pse kjo "shkallë e gjashtë gjykimi" për ish luftëtarët e UÇK-së, ishte imolave, e padrejtë dhe asimetrike.
Kryeministri argumentoi se një drejtësi që zgjatet pa fund nuk bën drejtësi. Ai përmendi rastin e Haradinajt dhe të tjerëve që kanë mbi 10 vite që enden gjykatave, fëmijët e të cilëve rriten me ankthin nëse i kanë prindrit heronj apo kriminelë.
Ai përmendi faktin se komuniteti ndërkombëtar po tregohet asimetrik, pasi Serbia që ishte agresore nuk i lejon fare hetuesit e huaj të merren me krimet e saj, ndërsa Kosova që ishte viktimë po i nënshtrohet hetimeve të njëpasnjëshme.
Megjithëse vuri në dukje njohuritë e tij të pakta juridike, ai e quajti Gjykatën Speciale të Hagës "unikale" në llojin e saj.
Pra po të dëgjosh argumentat e Ramës të vjen vetëvetiu një pyetje: A duhet ta mbështeste ai kur u ngrit dhe a duhet ta votonin liderët kosovërë këtë Tribunal? Kur kishin gjithë këto argumenta kundër, pse u sollën ndryshe?
Kësaj kontradikte, Rama nuk i dha dot përgjigje. Prandaj për të fshehur atë, ai përgjori një gjuhë patetike, një ton të lartë dhe patriotizëm folklorik për njollosjen e historisë.
Lexo më tej:
Rama me dy standarte ndaj Gjykatës së Hagës, ndryshe për Haradinajn, ndryshe për Thaçin
Të gjitha argumentat që ai rreshtoi i shkojnë në favor atyre që kërkojnë sot shfuqizimin nga parlamenti i Kosovës të kësaj gjykate që formalisht e është nën sovranitetin e tij.
Dhe politikanët maten me akte. Nëse mendon vërtet kështu, Rama le ta thotë troç qëndrimin e tij.
Në të kundërtën është hipokrizi edhe të shash gjykatën edhe të jesh për mbajtjen e saj në këmbë.
Pikërisht për të mbuluar këtë hipokrizi kryeministri ngritne zërin në parlament dhe zvatej në logorene e imoralitetit të deklaratave që vinin nga Haga.
©Lapsi.al
