Tenori i famshëm italian Andrea Bocelli realizoi një koncert mahnitës LIVE të Dielën e Pashkëve nga qendra e boshatisur e Milanos. Edhe pse ishte i pari koncert i mirëfilltë që nuk kishte asnjë spektator të pranishëm ai ka prekur dhe përlotur mbi 3.4 milionë ndjekës që e kanë parë online apo në TV koncertin e quajtur “Muzikë për shpresë”.
Ndjekësit e vlerësuan performancën e fuqishme të Bocellit si: “Prekëse, mahnitëse dhe madhështore!”. Bocellit iu dha akses ekskluziv në katedralen e mbyllur të Duomo nga Kryeprifti, Imzot Gianantonio Borgonovo, dhe Kryetari i Bashkisë, Giuseppe Sala. Sipas komenteve në rrjetet sociale Bocelli realizoi një nga shfaqjet e tij më ikonike deri më sot.
“Nuk mund të ndaloj lotët nga pamja e bukur dhe zemërthyer e Andrea Bocellit, i vetëm në Duomon e madh, me vetëm vendet bosh para tij. Ky moment në histori është i mrekullueshëm dhe plotësisht i trishtuar. Jemi me ty, Itali”, - shkroi dikush.
“Andrea Bocelli këndoi ‘Amazing Grace’ jashtë Duomos në Milano pak minuta më parë. Ishte magjepsëse”, - shkroi një tjetër. “Amazing Grace” e mahnitshme e Andrea Bocellit ishte një nga gjërat më të bukura që kam parë. E pabesueshme sa prekëse” – shkroi dikush tjetër.
Përpara koncertit Bocelli tha se “besonte në forcën e lutjes së bashku. Unë besoj në Pashkën e krishterë, një simbol universal i rilindjes për të cilën të gjithë – pavarësisht nëse janë besimtarë apo jo – me të vërtetë kemi nevojë tani” – tha tenori. ©LAPSi.al
