A po i rishkel syrin Edi Rama edhe njëherë kultivuesve të kanabisit, ashtu sikurse bëri në fillimet e qeverisjes së tij? A po kërkon ai edhe një njëherë rrugëdalje përmes hashashit, kur një krizë tejet e rëndë ekonomike, pritet të kanosë vendin pas asaj të koronavirusit?
Këto pyetje marrin hov pas intervistës së fundit të kryeministrit në "Zonë e Lirë", ku ai la të hapur mundësinë për legalizimin e tij për qëllime mjeksore. I pyetur nga Arin Çani për këtë mundësi, ai tha se qeveria është "në një fazë të avancuar, por jo në kapitullin e fundit të diskutimit të kësaj çështje". Ai shtoi: "Atë (hashashin- shenim i Lapsi.al) pa leje nuk e lejojmë, atë me leje po e studiojmë, se të tjerët e kanë bërë".
Po a është ky një sinjal që shteti nuk do i prekë ata që merren me bimën aq shumë të anatemuar? Dhe çfarë e detyroi Ramën të ndryshojë kaq radikalisht qëndrim?
Në mars të 2015- ës, pasi miku i tij më i ngushtë, një nga njerëzit më të fuqishëm në PS-në e asaj kohe Koço Kokëdhima, filloi fushatën për legalizimin e kanabisit mjeksor, Rama e kundërshtoi formalisht atë megjithëse Shqipria ishte mbjellë e gjitha me hashash. Në emisioni Opinion ai i tha Fevziut: “Jam kundër legalizimit të kanabisit dhe nën qeverisjen e kësaj mazhorance, nuk do të ketë legalizime të tilla”, konfirmoi prerë ai duke e konsideruar qëndrimin e ish deputetit Kokëdhima, si një opinion personal, të lirë me të cilin ai nuk qe dakord.
Por edhe në atë kohë dyshimi qe i fortë se Kokëdhima nuk vepronte me kokë të vet, por si njeriu më pranë Ramës ai e bënte këtë fushatë në publik për ti thënë në mënyrë të kamufluar qytetarëve se kjo gjë nuk pengohej nga shteti. Po të shihet intervista e Kokëdhimës me Ylli Rakipin në 2015, del e qartë se kjo hipotezë qe e fortë që atëherë (video poshte).
[video width="720" height="376" mp4="https://cdnimpuls.com/lapsi.al/wp-content/uploads/2020/04/Kocoo-1.mp4"][/video]
Efektet e kësaj politike vazhdojnë të ndihen edhe sot. Shqipëria u bë eksportuesi i dytë më i madh i hashashit në Europë dhe ende në verën e vitit 2019 një reportazh i transmetuar në edicionin qendror të lajmeve në Tv RAI 3, e shkërmoqi propagandën e qeverisë shqiptare, se “ka ç'rrënjosur drogën nga territori shqiptar”. Materiali investigues i gazetarit Valerio Cataldi, i faktuar me fotografimet e bëra nga ajri, theksonte se krahasuar me një vit më parë, prodhimi i hashashit ishte rritur me mbi 1200%.
Edhe në Raportin e Departamentit të Shtetit për drograt Shqipëria konsiderohet si vend origjine i trafikut të kanabisit (poshte).
Pra të gjitha këto, bashkë më implikimin e ish ministrit Saimir Tahiri më grupin e trafikanëtëve Habilaj rrëfejnë qartë se këtij lloj trafiku i është shkelur gjithnjë një sy nga lart.
Ndoshta këtë po bën edhe Rama sërish, duke thënë tani me gojën e tij atë që në 2015 vendosi ta thotë me gojën e Koço Kokëdhimës. Natyrisht pas krizës së fortë ekonomike që po pllakos ngado, pasi vende si Maqedonia e kanë hedhur me kohë këtë hap, Shqipëria nuk ka rrugë tjetër. Nisur nga kjo, nisur edhe nga fakti se legalizimi i kanabisit për qëllime farmaceutike nuk përbën mëkat, nuk është detyrimisht një gjë e keqe, sidomos për një forcë të majtë, ajo që kryeministri tha në Zonë e Lirë nuk përbën detyrimisht një mëkat.
Problemi është se duke parë atë që ndodhi në fillim të mandatit, kjo mos është një lojë për ti thirrur të gjithve: kultivoni hashash. Sepse ndryshe nuk ka si shpjegohet që Rama ka ndryshuar 100% qëndrim, pa dhënë asnjë sqarim për këtë piruetë.
©Lapsi.al
