Pas përballjes me ironitë dhe fyerjet e fansave të Taylor Swift, fill pas publikimit të telefonatës së kësaj të fundit me Kanye West për këngën “Famous”, Kim Kardashian reagoi gjerë e gjatë në Twitter.
Ajo shkroi se ky nuk është momenti i përshtatshëm për të folur mbi këtë ngjarje, duke iu referuar numrit të vdekjeve nga koronavirusi, por shtoi se nuk ka zgjidhje tjetër dhe akuzoi publikisht Taylor-in se po gënjen. “Që të jem e qartë, i vetmi problem që unë pata me këtë situatë ishte fakti që Taylor gënjeu përmes publicistit të saj kur tha se ‘Kanye nuk e telefonoi kurrë që t’i kërkonte mendim’. Ata folën, ndaj edhe unë publikova videon. Askush nuk e mohoi që fjala ‘bushtër’ u përdor pa dijeninë e saj.
Sipas Kim-it, “Taylor manipuloi të vërtetën”. “Në kohën kur ata po flisnin, kënga nuk ishte shkruar ende e gjitha, por siç mund ta kuptoni ajo manipuloi të vërtetën kur nuk pranoi se ishte njoftuar për këngën. Kur thashë dikur se Taylor gënjeu, e kisha fjalën për faktin që nuk pranoi që kishte biseduar me Kanye-n.” Në një tjetër postim, Kim thotë se “nuk i editoi kurrë videot” “Unë nuk i modifikova kurrë videot, thjesht postova disa momente në Snapchat që të kuptohej çfarë ndodhi. Videoja e plotë nuk e ndryshon aspak situatën. Unë kurrë nuk do t’i kisha publikuar pamjet, nëse Taylor nuk do të më kishte detyruar që të mbroja Kanye-n.”
