Ish-deputetja e Partisë Demokratike Albana Vokshi publikoi një video të një deklarate të Kryeministrit Edi Rama, ku kreu i ekzekutivit deklaron se janë marrë të gjitha masat për përballimin e koronavirusit. Megjithatë, Vokshi shkruan se sot “u publikuan dokumenta se Ministria e Shëndetësisë” ka hapur me urgjencë tenderin me afat 24 orë për blerjen e këtyre pajisjeve. Vokshi shkruan gjithashtu se “qytetarët duan dikë që qeveris dhe merr vendime në kohën e duhur”.
Reagimi Vokshit
Me gjoba nuk zgjidhet asgjë. Duhen masa mbrojtëse për stafin mjekësor, duhen tamponë dhe kite për testimin e popullatës, duhen pajisjet e nevojshme mjekësore për përballimin e fluksit. Asgjë prej këtyre në kohë, megjithëse Kryetari i PD Lulzim Basha, prej ditësh, i ka bërë thirrje qeverisë të marrë masa për pajisjen e spitaleve me mjetet e nevojshme, përfshirë, aparatët respiratorë. Vazhdimisht, kryeministri e ka hedhur poshtë duke theksuar se spitalet kanë pajisje të nevojshme.
Sot mediat publikuan dokumenta se Ministria e Shëndetësisë ka hapur me urgjencë tenderin me afat vetëm 24 orë për blerjen e këtyre pajisjeve
Situata nuk menaxhohet as me shpalljet e gjobave në ERTV, as me daljet e Ramës nga vila 2 milionë euro në Surrel, aq më pak, me sulme ndaj çdo propozimi të opozitës. Për shëndetin e mjekëve dhe të shqiptarëve duhen veprime të shpejta, që i paraprijnë përkeqësimit të situatës. Qytetarët kanë nevojë për dikë që qeveris dhe merr vendime në kohën e duhur për interesin e tyre. Qytetarët duan zgjidhje, jo të shtyjnë kohën duke parë Edi Ramën në televizor në mëngjes, në drekë dhe në darkë.
