“Qëllimi i takimit në Washington të Ambasadorit Richard Grenel me Presidentin e Kosovës dhe atë të Serbisë, Hashim Thaçi dhe Aleksandar Vuçiq në Shtëpinë e Bardhë ishte diskutimi i një marrëveshje dypalëshe bazuar në parimin e ndarjes së Kosovës” ka deklaruar ai.
Joseph që njihet si një nga ekspertët më të mirë amerikanë për Ballkanin, është i bindur se zgjidhja e mosmarrëveshjes mes palëve po kanalizohet drejt varianteve për të cilat, Thaçi e Vuçiqi kanë rënë dakord gjatë dialogut të ndërmjetësuar nga Federica Mogherini.
Por kjo ide e rrezikshme, e cila ngjalli shumë reagime në të gjitha vendet Ballkanike e sidomos në Berlin është mohuar nga pjestarët e takimit në Shtëpinë e Bardhë, të cilët megjithatë nuk e kanë bërë të ditur se për çfatë ishin mbledhur në Uashington.
Grenell ka reaguar edhe ndaj deklaratës së fundit të Edward Josephit, duke thënë se ky është “lajm i rremë”.
“Lajm i rremë. Kjo nuk është diskutuar kurrë në prezencën time. Edward Joseph është i pamatur këtu”, ka shkruar Grenell në postimin e tij të fundit në Twitter.
Lexo më tej:
Andi Bushati: Albinit “anti- amerikan”
Rreth deklaratave të analistit amerikan Edward Joseph, rreth planit për ndarje të Kosovës dhe shkëmbimit të territoreve, ka reaguar edhe presidenti i Kosovës Hashim Thaçi. "Është zhgënjyese të shohësh se si analistë të caktuar, në mënyrë të thjeshtë krijojnë planet e tyre fiktive (shkëmbim territoresh, ndarje, autonomi) dhe ua atribuojnë ato atyre që janë duke provuar të bëjnë marrëveshje historike mes Kosovës dhe Serbisë. Përhapja e lajmeve të rreme s’e ndihmon këtë proces”, ka shkruar Thaçi.
Por sikur të qe i ndërgjegjshëm për reagimet që do të merrte Edward Joseph i ka paraprirë atyre në intervistën e tij : « çështja është se në dobi të kujt do të arrihet një marrëveshje e tillë? Të Thaçit, Vuçiqit apo SHBA-së – apo nga ana tjetër, të shqiptarëve e serbëve që jetojnë në Kosovë dhe në Serbi” pyeste ai duke lënë të kuptohet se në këtë « deal » mund të kishte më shumë interes për sfidat personale sesa për ato të popujve që prekeshin prej tyre.
©Lapsi.al 
