Kryeministri Edi Rama ka zhvilluar dëgjesën e parë publike sot me banorët e Shijakut, në kuadër të rindërtimit të banesave të dëmtuara nga tërmeti. Kryeministri nuk i dha dorën njërit prej ekspertëve italianë që ishte i pranishëm në këtë takim, pasi sipas tij, Italia është një nga vatrat e nxehta të koronavirusit, dhe kjo s’është punë trimërie.
“S’të jap dorën se vjen nga Italia dhe si dihet kurrë. Se dija që kishte ardhur me kolegen, se do ia jepja asaj fjalën..megjithatë…mbase nuk dhashë shembull shumë pedagogjik me dhënien e dorës, por në fakt, nuk jam i lumtur me këtë bombardim lajmesh për koronavirusin.”-tha Rama.
Nga Italia, kryeministri solli shembullin shqiptar dhe tha, se ka një “infodemi” lajmesh të financuara nga burime që duan që njerëzit të dalin në rrugë. Ai theksoi se janë marrë të gjitha masat, nëse koronavirusi konfirmohet edhe në Shqipëri. “Është problem për të gjithë botën, por ajo që është e sigurtë, është se krahas me epideminë, ka një infodemi të lajmeve të rreme, të komenteve pa asnjë bazë shkencore, që rrit panikun, ankthin dhe pasigurinë tek njerëzit. OBSH na ka dhënë porosi të përditshme, të jemi të kujdesshëm. Ndaj bëjmë kujdes me kontaktin, thashë edhe për gjestin tim jo-pedagogjik të dhënies së dorës. Por duhet të jemi të kujdesshëm. Në Shqipëri ka njerëz që duan panik. Dihet kush i ushqen burimet që hapin panik. Duan të dalin shqiptarët në rrugë. Nuk ka vend për panik. Mos ardhtë, por po erdhi, ne i kemi marrë masat.”-tha Rama.
