Ndërsa presidenti Meta në një intervistë live, tek Çim Peka, e shmangu me kujdes polemikën duke thënë se nuk e kishte lexuar deklaratën e ambasadores, por se ai e kishte ngritur atë flamur në nderim të qytetarëve shqiptaro- amerikanë prezentë në atë tubim.
"Nuk e di për çfarë deklarate bëhet fjalë se nuk kam pasur kohë të shikoj lajme. Kam pasur në selinë e Presidencës shumë personalitete nga ata që folën në tubim, shumë shqiptaro- amerikanë që kishin ardhur nga SHBA", tha ai.
Por, pavarësisht nga kjo deklaratë jo polemizuese, reagimet nuk janë ndalur. Megjithatë, ato kanë pasur të gjitha një fokus, që ndoshta është i gabuar. Sepse ato janë përqëndruar rreth nderimit që i bëhet flamurit amerikan nga të gjithë shqiptarët.
“S’ka arsye të habitet ambasadorja për flamurin amerikan. Shqiptarët, demokratë, LSI, grekë që jetojnë në Shqipëri, janë pro- amerikanë dhe kanë të drejtë ta mbajnë flamurin amerikan. Edhe presidenti nuk më duket anti- amerikan, kështu që dikush mund ta sqarojë ambasadoren që të mos habitet kur sheh flamurin amerikan, sepse shqiptarët e kanë ëndërr të parealizuar Amerikën”, tha në Real Story analisti Agron Gjekmarkaj.
Ndërsa më ironik ishte në një status të tij, gazetari Andi Bejtja: “Këtë punën e Juri Kim për Flamurin Amerikan të valëvitur në manifestimin për Kushtetutën, kur Meta e bëri të qartë që po përshëndeste shqiptarët e ardhur nga USA vështirë ta shpjegosh…. Madje ka ngatërruar dhe shumë popull: duke filluar që nga ata që e mbajnë flamurin amerikan në ballkone edhe në ditën e hashures si dhe ato femra që i kanë rrobat e banjos me flamurin amerikan…”.
Në të njëjtën linjë, por me tone disi më të ashpra u tregua Frank Shkreli, ish- Drejtor i VOA-s për Euro-Azinë dhe ish-anëtar i delegacionit të parë të DASH më 1991, që hapi ambasadën e SHBA-ve. Në një letër publike (lexo të plotë linkun poshtë) ku e kritikon ambasadoren për ngutje ai shkruan: “…unë do isha shumë më i pakënaqur në qoftë se flamuri i vendit tim të adaptuar, Amerikës tonë të dashur, që na ka dhënë strehim mijëra shqiptaro -amerikanëve si unë, ta shikonim në manifestime të tilla duke u djegur ose shkelur, ashtu siç ndodh shpesh në shumë vende të tjera të botës”.
Dhe në fakt Shkreli me të drejtë e çon debatin në një hulli tjetër: po pse ambasadorja u shqetësua kur flamuri i vendit të saj as nuk u shkel, as nuk u dogj, por vetëm u lartësua, duke u brohoritur nga dhjetra mijëra vetë.
Dhe këtu vijmë te thelbi i problemit që po keqinterpretohet. Ndërhyrja e ambasadores Yuri Kim nuk qe një akt për të mbrojtur flamurin e atdheut të saj, por një mesazh për të dalë në krah të kryeministrit të vendit tonë. Ajo qe një mënyrë ankthioze, e nxituar, mendjelehtë për të marrë anë dhe për të treguar se më kë është rreshtuar.
Dhe më mirë se gjithçka këtë e provojnë deklarata si ato të Erion Braçes, i cili e ribotoi statusin e Yuri Kim duke bërë komentin: “Shpulla e parë kundër Metës”.
Atë e përforcojnë titujt e mediave proqeveritare, që të shushatura prej përmasave të mitingut, u kapën pas ambasadores si i mbyturi pas fijes së flokut për të prodhuar një lajm negativ.
Në këtë këndvështrim, Yuri Kim nuk ka bërë asgjë të ndryshme nga paraardhësi i saj Donald Lu, që e quante histori suksesi luftën kundër drogës (video e pare poshte), kur Saimir Tahiri ishte ministër dhe kur kanabisi kish përmbytur mbarë Shqipërinë. Ajo nuk ka ndryshuar linjë nga e njëjta ambasadë e Lu-së, që e përshëndeti hapjen e negociatave për Shqipërinë nga BE, që tre vite më parë.
Ajo është në të njëjtën vazhdimsi me Leila Moyes, që nuk tha dot një fjalë për gënjeshtrat skandaloze të Ramës se ata që ai caktonte si prishës së zgjedhjeve njëpartiake, Amerika do t'u ndalonte hyrjen në vendin e saj (video e dyte poshte).
Pra edhe në këtë rast, thelbi i problemit nuk duhet ngatërruar. Ambasadorja nuk ndërhyri pas tubimit të Metës për të mbrojtur flamurin e saj, ajo e bëri për të mbrojtur Edi Ramën. Ajo foli për t'i dhënë pak oksigjen atij në një ditë të vështirë. Boll të lexohet me vëmendje mesazhi i saj, që e tregon qartë atë që ka pasur në mendje. Aty theksi nuk vihet tek “surprizimi” për përdorimin e flamurit, por tek distancimi nga mitingu i Metës.
©Lapsi.al
[video width="848" height="480" mp4="https://cdnimpuls.com/lapsi.al/wp-content/uploads/2020/03/WhatsApp-Video-2020-03-03-at-11.50.53-AM.mp4"][/video]
