Butrint Imeri nuk po ndalet me bashkëpunimet!
Pas suksesit që pati me Ermal Fejzullahun, me të cilin risolli këngën e vjetër “Për një dashuri” të publikuar fillimisht në 2005-n, Butrinti ka konfirmuar bashkëpunimin e radhës.
Në një bisedë me një ndjekës në Instagram, këngëtari i është përgjigjur me “po” pyetjes nëse do të bëjë një bashkëpunim me ndonjë artist tjetër.
Këngëtari nuk e ka zbuluar ende emrin e artistit, por sigurisht që do të jetë super i njohur për të gjithë, ashtu si çdo bashkëpunim që ka realizuar ai.
Ky lajm vjen pas publikimit të hitit me Ermalin, i cili ka marrë deri më tani mbi 5 milionë klikime.
Kënga e përpunuar ka ardhur me më shumë ritëm dhe prezenca e Butrintit i ka dhënë një tjetër nuancë asaj.
Ermal Fejzullahu u shpreh se e kishte pikë të dobët këtë këngë aq të suksesshme dhe sigurisht që kishte rezerva në fillim për rikthimin e saj, por me sa duket çdo gjë shkoi mirë.
