Të gjithë personalitetet që dolën në tubimin e presidencës përkrah Ilir Metës u bashkuan nga një ide: I duhet thënë ndal rregjimit, kapjes së shtetit vendosjes së neo diktaturës. I vetmi sllogan që i bashkoi të gjithë me Metën ishte: "Kur institucionet bien, ngrihet populli"
Ja fragmentet më pikante të thirrjeve të tyre:
Edmond Budina: Jemi këtu për t’i thënë jo neo-diktaturës që nuk ka për të fituar. Çdo lloj salep-sulltani që mundohet të vendosë sulltanatin e tij nuk do t’ia dalë kurrë, nuk do t’ia dalë kurrë ta shkatërrojë dhe zbrazë Shqipërinë. 30 vite më parë kishim ëndrrën ta bëjmë Shqipërinë si gjithë Evropa dhe ne do ta bëjmë duke shporrur këtë oktapod që nuk ka asgjë socialiste për të mbrojtur Kushtetutën dhe institucionet.
Kristjan Demaj: “Edhe pse nuk kam lindur këtu zemra ime është vetëm kuq e zi. Zemra ime rreh për këtë vend të mrekullueshëm që nuk duhet ta lëmë të shpopullohet. Rreh për këtë rini që duhet ta ndërtojë të ardhmen këtu. Sot është dita e shqiponjave, e besëlidhjes kuq e zi. I ftoj të gjithë shqiptarët ti bashkohen besëlidhjes sonë kuq e zi. Beteja për kushtetutën është beteja e të gjithëve, për të ardhmen tonë. Të gjithë së bashku në mbrojtje të kushtetutës, të demokracisë”.
Oneda Skënderi: Faik Konica do të shkruante dikur: “Shumë broçkulla i falen politikanëve, por pa i kaluar kufijtë”.Të mos respektosh parimet e shëtit të së drejtës, është të kalosh kufijtë, ta kthesh Shqipërinë në kohën e partisë shtet, është të kalosh kufijtë, ta lesh vendin pa Gjykatë Kushtetues është të kalosh kufijtë, t’u mohosh njerëzve të shprehen lirisht dhe të intimidosh mediat është të kalosh kufijtë. Për t’i thënë ndal atyre që shkelin Kushtetutën tonë, shpresën tonë, jam këtu që zëri i sovranit të dëgjohet dhe do dëgjohet me doemos. Kushtetuta e Republikës së Shqipërisë është mbi gjithçka dhe këdo.
Agim Nesho: Një pyetje për miqtë ndërkombëtarë: kush e destabilizon Shqipërinë, ata që ndërtojnë një Shqipëri pa drogë, pa korrupsion, pa krim, apo një pakicë në pushtet që ka ndërtuar një platformë të ndyrë dhe nuk premton asgjë për të ardhmen? Mbroni republikën tuaj nga tirania e maxhorancës”.
Ledio Bianku: “Po tju uroj duke thënë “Zoti ju bekoftë”, është si tju them se fatin tuaj e ka ne dore zoti, nëse ju them se “liria qoftë me ju” kjo do të thotë se e ardhmja është në dorën tuaj”.
Bujar Kapexhiu: “Jemi një vend një partiak. Jemi një vend me progres ekonomik, gënjeshtër. Jemi një vend i varfër, i rrënuar, i sfilitur dhe në braktisje çdo ditë drejt boshllëkut. Politika është e mbushur me pinokë gënjeshtarë. Mos u gënjeni, e vërteta mbrohet vetëm nga zëri juaj, vullneti juaj, shpirti juaj dhe po të jetë nevoja edhe nga grushti juaj. Të gjithë së bashku të veprojmë me Kushtetutën”.
