Ashtu siç u tha nga Presidenti Meta pasi dorëzoi padinë në SPAK, kreu i shtetit ka kallëzuar penalisht jo vetëm Ministren e Drejtësisë Etilda Gjonaj, por edhe dy zyrtarë të tjerë të lartë.
Përmes një njoftimi për shtyp, Presidenca sqaron se janë paditur dhe sekretari i përgjithshëm i Ministrisë së Drejtësisë, shtetasdi Gentian Deva si dhe Etleva Haxhia, drejtoresha e Qendrës së Botimeve Zyrtare.
NJOFTIMI I PLOTË I PRESIDENCËS
Presidenti i Republikës Sh.T.Z Ilir Meta ka depozituar sot kallëzimin penal pranë SPAK, ndaj 3 funksionarëve të lartë të Ministrisë së Drejtësisë, dhe konkretisht:
-Etilda Dalip GJONAJ, me detyrë Ministre e Drejtësisë.
-Gentian Fehmi DEVA, me detyrë Sekretar i Përgjithshëm i Ministrisë së Drejtësisë.
-Etleva Admir HAXHIA, me detyrë Drejtoreshë e Qendrës së Botimeve Zyrtare.
Ata akuzohen se në bashkëpunim, kanë konsumuar veprat penale të mëposhtme:
“Shpërdorim i Detyrës”, parashikuar nga neni 248 i Kodit Penal;
“Ushtrimi i ndikimit të paligjshëm ndaj personave që ushtrojnë funksione publike”, parashikuar nga neni 245/1 i Kodit Penal;
“Falsifikim i dokumenteve”, parashikuar nga neni 186 i Kodit Penal
“Përvetësimi i titullit apo i detyrës shtetërore”, parashikuar nga neni 246 i Kodit Penale.
Edhe këtë kallëzim Presidenti e depozitoi pranë Prokurorisë së Posaçme Kundër Krimit të Organizuar dhe Korrupsionit (SPAK) jo vetëm nisur nga fakti që është një hap procedurial vijues në vijim të Kallëzimit të bërë në datë 19.11.2019 dhe Kallzimit Shtesë të bërë në datë 18.02.2020, por dhe për faktin se kompetenca lëndore i përket SPAK sipas nenit 148/4 dhe 135/2 të Kushtetutës dhe neneve 25/3 dhe 75/a të Kodit te Procedurës Penale.
