Investimet totale sipas sektorëve në ekonomi u rriten me 3 për qind në vitin 2018 në krahasim me një vit më parë, por investimet në sektorin e ndërtimit u zgjeruan me ritme më të larta raportoi INSTAT në rezultatet e Anketës Strukturore të Ndërmarrjeve më 2018.
Investimet në sektorin e ndërtimit në vitin 2018 arritën në 38,9 miliardë lekë me një zgjerim me mbi 50% në raport me një vit më parë. Kjo ishte rritja më e lartë në raport me degët e tjera të ekonomisë, te nxitura nga investimet në projektin e gazsjellësit TAP dhe HEC-ve në lumin në Devoll, por edhe vrullin e ndërtimeve.
Investimet totale të sipërmarrjeve në ekonomi arritën në 238 miliardë lekë në vitin 2018, duke u zgjeruar me rreth 3 për qind në raport me një vit parë.
Pas sektorit të ndërtimit, sektori me zgjerimin më të larta të investimeve ishte tregtia me rreth 33%, e ndjekur nga hotelet dhe restorantet me 29%, shërbimet me 28 %, transporti me 16% dhe industria përpunuese me 1.2 për qind.
Në të kundërt, industria nxjerrëse dhe sipërmarrjet e sektorit të energjisë dhe ujit shënuan rënie të investimeve përkatësisht me 39 dhe 22%.
Në vlera neto investimet më të larta në ekonomi në vitin 2018 i kishte sektori i energjisë dhe gazit me 55,3 miliardë lekë, duke zënë 23 për qind të totalit të investimeve në ekonomi të cilat në vitin 2018 arritën në 238 miliardë lekë.
Sektori i dytë me peshën më të lartë të investimeve në raport me totalin i kishte tregtia me 44,2 miliardë lekë gjithsej, duke zënë 18.5 % të totalit të investimeve këtë vit.
Sektori i Ndërtimit vjen i treti duke zënë 16 % të të totalit, më tej industria përpunuese me 14 % të totalit, Shërbime të tjera me 10% të totalit dhe industria nxjerrëse me 7.7% të totalit.
Peshën më të ulët në raport me totalin e investimeve e ka sektori i hoteleve dhe restorante me 3.2%. /monitor
