Ermal Mamaqi iu përkushtua prodhimit të “I love Tropoja”. Pas përfundimit të fazës së postproduksionit, Ermali nisi menjëherë të kujdesej për reklamimin e filmit, si dhe për premierën e shfaqjen për publikun e gjerë.
Mbrëmja e djeshme gjeti disa nga emrat më në zë të showbizit, e jo vetëm, si të ftuar specialë në Pallatin e Kongreseve, për të shijuar nga afër “I love Tropoja”. Paralelisht, në “Soiree” në Top Channel u transmetua inrervista e Mamaqit, i cili ndër të tjera u pyet nëse televizioni është në planet e tij të afërta apo jo. I vendosur se tashmë do t’i dedikohet më shumë rolit të tij në kinematografi, Ermali shpjegoi se kishte kuptuar që televizioni i kishte marrë shumë kohë nga karriera.
“Tani shpejt jo. Kam qenë në një periudhë shumë të vështirë për të zgjedhur, moment i rëndësishëm që mora vendimin. Por kur ktheva kokën pas, pashë që kisha bërë 6 vite emisione duke përfshirë këtu edhe Digitalbin, edhe kisha realizuar 248 emisione, “6 ditë pa Ermalin” dhe “Xing me Ermalin””, është shprehur Ermal.
Ai gjithashtu ka shtuar se ekrani e ka konsumuar atë si imazh, një arsye edhe më e fortë për të qëndruar larg televizioneve për një periudhë kohe: “Ishte një konsum i jashtëzakonshëm i personazhit tim, por edhe e gjithçkaje çfarë ndodh atje. Jo çdo gjë ia vlen ose mbetet, kështu që vendosa t’i përkushtohem kinematografisë. Hapi im i radhës do të jetë një film tjetër. Kam disa ide, disa histori. Jam akoma në kërkim të historisë më të mirë.”
