As fatura e lartë financiare dhe as akuzat për abuzime nuk do të ndërpresin koncesionet në shëndetësi. Këtë e ka bërë të ditur kryeministri Edi Rama.
Edhe pse i cilësoi PPP-të “modele të mallkuara”, Rama tha se pa to nuk do të ishte i mundur përmirësimi i shërbimeve.
Kryeministri Rama ka marrë pjesë në inaugurimin e spitalit të ri kirurgjikal në qendrën spitalore “Nënë Tereza”.
Godina e re ka 120 shtretër dhe 7 salla operatore. Çdo vit në këtë shërbim kryhen 9 mijë ndërhyrje në vit dhe 23 mijë mikrokirurgji.
Vitin e ardhshëm pritet të përfundojë spitali i ri i sëmundjeve të brendshme dhe ai i pediatrisë po në QSUT.
Spitali i ri i Kirurgjisë, që mban emrin e kirurgut të njohur Frederik Shiroka, ka kushtuar 8.8 milionë euro, investimi i qeverisë shqiptare nëpërmjet kredisë së Bankës së Këshillit të Europës.
