Andi Bushati: Liria e medias nuk mbrohet dot në zyrën e Ilirit
Se sa të sinqertë janë ata në këtë anatemim që i bëjnë dy prej kollonave të një demokracie, pushtetit të tretë dhe të katërt, kjo kuptohet lehtë. Ndonëse ata i godasin në bllok, kur u duhet ata i përdorin deri në skaj edhe “KÇK” edhe “kazanin”, siç bën Rama kur fiton gjyqet ngaj gazetarëve dhe opozitarëve apo kur përdor mediat e mëdha për të luajtur rolin e shpërndarësit të sinjalit të ERTV-së. Dhe duke parë se Rama dhe idhtarët e tij kanë dy standarte, një pjesë e madhe e publikut janë të bindur se ata betejën kundër pushteteve të pavarura nuk e kanë për t'i pastruar, por për t'i kapur ato. Ky segment i shoqërisë tashmë i ka të qarta qëllimet reale të Rilindasve. Por ka edhe nga ata që ende nuk janë bindur se lufta e Edi Ramës ka si synim të mposhtë edhe ato pak kundër pushtete që nuk i ka kapur ende. Dhe për ata ka një pyetje të thjeshtë: A besojnë se vërtet lideri i tyre mund të ketë të drejtë edhe kur përleshet me mediat dhe kur përgojon njerëzit e drejtësisë, edhe kur e etiketon opozitën se është futur në rrugë qorre kundër interesave të vendit edhe kur do të shkarkojë presidentin, edhe kur i kundërvihet Bild-it apo Zërit të Amerikës edhe kur i etiketon si të blerë nga PD-ja deputetët e Bundestagut edhe kur ironizon holandezët se trafikojnë më shumë drogë sesa ne? Pra pyetja është e thjeshtë: A ka heroi i tyre gjithçka mirë dhe gjithë të tjerët janë gjithnjë gabim? Pa dhënë këtë përgjigje themelore, nuk mund të kuptohet asnjë nga konfliktet e përveçme të Edi Ramës. Të mara tek e tek, ato relativizohen. Shepsh mund të duket sikur mediat i bien në qafë më tepër sesa duhet, sikur gjyqtarët dhe prokurorët e kanë bërë baltë, sikur në këtë vend mund të kishim një president më të mirë se Meta, sikur opozita ndërkohë mund të qe reformuar, sikur këta të huajt shpesh tregohen si tepër albanofobë. Por kur sheh pamjen e përgjithshme dhe kupton se është një njeri i vetëm i cili “rastësisht” gjendet në konfikt me të tërë, atëhere nuk të mbetet zgjedhje tjetër për të bindur veten: ose ky njeri mishëron Krishtin e ringjallur që na premton një botë më të mirë, ose thjesht ai është një bandit, që po tenton të vërë çdo kënd nën thundrën e tij. ©Lapsi.al
