Ka përfunduar pa tension aksioni i IKMT, mëngjesin e sotëm në zonën e Astirit. Bëhet fjalë për shembjen e pesë ndërtesave që preken nga projekti i Unazës së Madhe.
Prej orëve të para të mëngjesit, forca të shumta policie bllokuan të gjitha lëvizjet në unazë, si të mjeteve, ashtu edhe të këmbësorëve, për të shmangur ndonjë përplasje të mundshme me banorët.
Por aksioni ka qenë i qetë dhe IKMT ka shembur ndërtesat e planifikuara.
Pas disa orësh bllokimi të rrugës për qytetarët që duhet të shkonin në punë apo në shkollë, tashmë Unaza është hapur dhe ka nisur lëvizja normale, ndonëse është krijuar radhë kilometrike makinash që vijnë nga “Pallati me Shigjeta” drejt ish-Sheshit “Shqiponja”.
