PD përkrah SHBA-në në operacionin e sotshëm ku mbeti i vdekur gjenerali iranian Qasem Soleimani, bashkë me komandantin ushtarak të Irakut dhe disa ushtarakë të tjerë. PD thotë se vendimi i Trump për këtë akt ishte në mbrojtje të paqes dhe demokracisë ndërkohë shprehet se jo vetëm tani në opozitë por dhe kur të vijë në qeveri, PD do të jetë gjithmonë krahë SHBA-së sidomos në luftën kundër terrorizmit.
Partia Demokratike mbështet angazhimin e SHBA në luftë kundër terrorit. Vendimi i presidentit Trump për goditjen e njërit prej arkitektëve dhe drejtuesve të aktiviteteve terroriste është nje akt i fortë lidershipi dhe mbrojtje e vlerave demokratike e të paqes. Partia Demokratike, në çdo kohë, qëndron në krah të SHBA,sot në opozitë duke u solidarizuar tërësisht dhe nesër në qeverisjen e vendit me angazhim total e aktiv në përmbushje tē detyrimeve e kontributeve në mbështetje të plotë të Koalicionit Global kundër Terrorit, tē udhëhequr nga SHBA.
Qasem Soleimani mbeti i vdekur pas një sulmi të forcave ajrore të SHBA mbi aeroportin e Baghdad. Bashkë me të humbën jetën dhe komandanti ushtarak irakian Abu Mahdi al-Muhandis, katër ushtarakë irakianë dhe një tjetër iranian. Debat i madh në gjithë botën ka lindur për këtë çështje ku vendet perëndimore janë vendosur krah SHBA-së ndërsa Iraku me Iranin e kanë dënuar ashpër.
