Koordinatori i Bindjes Demokratike, Astrit Patozi, deklaroi se Partia Demokratike nuk i dëshiron zgjedhjet e parakohshme. Sipas tij, PD nuk po jep shenja dhe nuk po rrit presionin ndaj qeverisë për të çuar vendin në zgjedhje të parakoshme.
“PD bën sikur kërkon zgjedhje të parakohshme, por nuk i do. Nuk jep shenja që kërkon zgjedhje. Nuk po rrit presionin ndaj qeverisë, e ka me nge këtë punë”, tha Patozi në studion e A2.
Ai nënvizoi se koha i ka dhënë të drejtë Bindjes Demokratike, e cila mori pjesë në zgjedhjet e 30 Qershorit.
“Nuk jam penduar aspak. Neve na dha të drejtë koha sepse thamë që zgjedhjet do të bëhen dhe nuk do të ketë konflikt. Kështu ndodhi. Të tjerët duhet të pendohen sepse bënë zgjedhjen e gabuar. E vetmja zgjidhje në rend demokratik, pavarësisht problemeve, janë zgjedhjet”, tha Patozi.
Përsa i përket Reformës Zgjedhore Patozi u shpreh se do të jetë arnim i këtij sistemi, me implementimin e disa rekomandimeve të OSBE\ODIHR.
“Bindja Demokratike ka prezantuar një platformë serioze që i jep zgjidhje problemeve të mëdha që sot vendi për shkak të keqqeverisjes. Shqipëria duhet të dalë jashtë kryetarokracisë, që është gjeneratori i korrupsionit dhe abuzimit me pushtetin. Duhet të shkojmë në një sistem ku qytetarët kanë mundësi të zgjedhin”, tha Patozi.
