Të paturit një këngë sezonale, të përvitshme, në këtë rast një këngë Krishtlindjesh, mund të jetë një biznes më vete. Çdo vit, artistët marrin të ardhura shtesë nga një këngë e vetme. Për shembull, sipas një raportimi të The Economist në 2016-n, Mariah Carey fitonte vetëm nga Mbretëria e Bashkuar 60 milionë dollarë në vit nga përdorimi i këngës.
"All I Want for Christmas Is You" u publikua në vitin 1994, kur Mariah ishte vetëm 25 vjeçe. Prej asaj kohe, kënga e Krishtlindjeve dëgjohet çdo vit, me të po të njëjtin interes si në '94-n. Së fundmi, kënga u rendit në vendin e parë në Hot100 në Billboard, për herë të parë në 25 vite.
Për aq kohë sa këngët e Krishtlindjeve janë një biznes më vete, pse ka kaq pak këngë të famshme për festat e fundvitit? Në fakt, një pjesë e mirë e artistëve publikojnë këngë me rastin e festave, por njerëzit nuk i dëgjojnë. Ato nuk kthehen në hit, nuk vendosen nëpër radio, televizion, qendra tregtare dhe festa. Këto këngë të reja duket sikur nuk ekzistuan kurrë. Dan Vallie, presidenti i National Radio Talent System në Amerikë, institut që zbulon dhe përgatit talentet e ardhshme në fushën e radios, tha për CNN se problemi me këngët e reja të Krishtlindjeve qëndron te fakti që nuk kanë thjeshtësinë. "Gjëja më e ndërlikuar te këngët e Krishtlindjeve qëndron te thjeshtësia. Por të shkruash një këngë të thjeshtë është e vështirë," tha ai.
Sipas Vallie, këngët e fundvitit duhet të jenë këngë me melodi ritmike, të cilat të ftojnë të kërcesh, të bëjnë të humbasësh mes tingujve, të përcjellin tingujt e këmbanave, fëmijëve që vrapojnë, të qeshurave dhe përqafimeve.
Kjo është arsyeja pse kur vjen puna te këto këngë, Shakin' Stevens (Merry Christman Everyone), Mud (Lonely This Christmas), Darlene Love (Chistmas - Baby Please Come Home) apo Mariahh Carey (All I Want For Christmas Is You) qenë më të suksesshëm aty ku Whitney Houston, Britney Spears apo Kanye West nuk mundën.
