Jashtë finales së “Festivalit të Këngës” mbetën disa emra të mirë të muzikës shqiptare si Kanita, Renis Gjoka, Devis Xherahu, Aldo Bardho dhe Nadia & Genc Tukiçi.
Këta që përmendëm, e pranuan në heshtje rezultatin, ndryshe nga Kastro Zizo apo Wendi Mancaku apo Stresi të cilët nuk ndenjën pa i shkruar disa rreshta.
Kastro Zizo falenderoi bashkëpunëtorët dhe u shpreh se “finalja është thjesht statistikë”.
“Falenderoj secilin prej jush që tingujt dhe tekstin e këngës ‘Asaj’ e pëlqyet dhe e shijuat. Shpresoj të ngelet një himn për çdo nënë të larguar nga kjo botë. Ne hymë thellë në zemrat tuaja. Vlerësoni çdo moment me të dashurit tuaj, me nënat, baballarët, motrat, vëllezërit, fëmijët, gratë, burrat dhe çdo gjë të shtrenjtë tuajën. Një finale në festival është thjesht statistikë, me rëndësi që dhamë dhe morëm dashuri pa fund. Suksese dhe artistëve finalistë dhe fitoftë më i miri.”
Stresi gjithashtu shkroi diçka për mungesën e këngës “Bohem” në finale.
“Ju falenderoj përzermërsisht të gjithëve që na suportuat. Sa më shumë e mendoj aq më shumë e kuptoj që s’ka asgjë më artistike se të duash të tjerët. Urime të gjithë finalistëve, e meritonit. Eli Fara mos u mërzit, ne kemi publikun me vete, s’ka më finale se kjo. Mbi të gjitha ishte privilegj të punoje me ty Vera Grabocka. Artist nuk bëhesh nga një çmim, ne jemi në shpirt të tillë.”
Wendi Mancaku nuk foli në mënyrë të drejtpërdrejtë për skualifikimin, por përkrahu mendimin e një ndjekësi që shkroi se “nëse do të kishte meritokraci në vendin tonë, Wendi do të ishte fituese.”
