Sa më shumë ftohen gjakrat pas tragjedisë së 26 nëntorit, aq më tepër po diskreditohet Edi Rama si një kryeministër që më shumë sesa për qytetarët interesohet për oligarkët. Këtë gjë e ka vënë në pah edhe propozimi i Partisë Demokratike, që kostot financiare të pasojave të tërmetit të parballohen nga shfuqizimi i koncesioneve. Kryetari i Partisë Demokratike publikoi këtë të hënë 3 pika të cilat, sipas tij, do të shërbejnë për daljen nga situata e emergjencës. Në pikën e tretë ai i kërkoi qeverisë të anulojë 150 milionë euro PPP, të cilat do tu jepen oligarkëve.
“Për sa i përket pastaj historisë së oligarkëve, unë nuk e di se cilët nga ata që fshihen pas këtij emri, të hiqen. Duhet të ndalojmë kontrollin shëndetësor bazë të popullsisë për të rindërtuar? Jo! Duhet të ndalojmë pagesat për hemodializën e atyre që shyqyr që iu ra trupi rehat aq sa mund t’u bjerë atyre njerëzve që kanë sëmundje të rëndë në trup? Duhet të ndalojmë pagesat për instrumentet mjekësor që e kemi ulur thuajse në zero numrin e infeksioneve? Jo! Duhet të ndalojmë punimet për Rrugën e Arbrit? Në asnjë mënyrë,” tha Rama duke hedhur poshtë propozimin.
Por ai bllofoi rëndë së paku në dy pika për të mos tërhequr pas lekët që ka premtuar.
Te koncesioni i Check Up përshembull, ai rriti artificialisht moshën e njerëzve që duhet të bënin analiza, vetëm për të dhënë edhe vitin pasardhës po aq shumë para për ekzaminimet që qytetarët rrefuzonin ti kryenin.
Rama bllofon edhe me renditjen e koncesioneve që bën, sepse ai qëllimisht përmend ato që kanë filluar dhe ajo për të cilët biznesi nuk ka shpenzuar ende asnjë lek. Sipas gazetarit të BIRN Gjergj Erebara, ka disa mundësi ku buxheti i koncesioneve, 2.2 miliardë euro, mund të preket për të përballuar kostot e tërmetit.
"Ligji për Buxhetin e Shtetit ka një listë të këtyre projekteve nga të cilat është shumë e lehtë të zgjedhësh se çfarë mund të shtysh për më vonë: Milot – Balldre është një projekt autostrade me kosto të planifikuar 32 miliardë lekë ose 270 milionë euro dhe që synon ndërtimin e një rruge prej vetëm 17 kilometrash të gjatë. Kjo është një nga shumë projektet e infrastrukturës, të cilat që para tërmetit ishin kontroverse dhe të paarsyeshme. Anulimi i kësaj kontrate tashmë që ajo nuk ka nisur ende është një hap shumë i logjikshëm për të siguruar fonde për rindërtimin. Por Milot – Balldre është larg të qenit e vetmja. Nëse kostot e rindërtimit nga tërmeti janë më shumë se sa kaq, kemi projekte të tjera që mund të anulohen: 1. Rruga Orikum Dukat, kostoja 83 milionë euro. 2. Incineratori i Tiranës, kostoja e paidentifikuar. 3. Incineratori i Fierit, kostoja e paidentifikuar. 4. Unaza lindore e Tiranës, kostoja 38 milionë euro. Në veçanti, anulimi i dy koncesioneve të rrugëve është veprim i logjikshëm për shkak se këto projekte nuk kanë nisur të zbatohen" thotë ai.
Por në këtë pikë Rama nuk dëgjon askënd, as llogari dhe as argumenta, pasi në një pikë ai është i vendosur: as nuk e shpie nëpërmend t'ua heqë të pasurve për tua rishpërndarë të pambrojturve.
©Lapsi.al
Lista e koncesioneve të firmosura nga Rama
Konçesioni i check-up – 90 milionë USD
Sterilizimi – 160 milionë USD
Dializa – 70 milion USD
Shërbimi laboratorik – 90 milion USD
Inceneratori i Elbasanit – 52 milion USD
Inceneratori i Fierit – 40 milion USD
Inceneratori i Tiranës – 310 milionë USD
Rrugët e Devoll Hdrp – 68 milion USD
Ndërtimi i shkollave në Tr – 80 milion USD
Rruga Milot Balldren – 300 milionë USD
Rruga Orikum-Dukat – 75 milion USD
Trau te rruga e Kombit – 470 milion USD
Rruga e Arbërit – 400 milion USD
__________________
Totali: 2.2 miliardë USD
