Teksa është ndalur sot në ditën kundër dhunës ndaj grave, Edi Ramanuk ka lënë pa shigjetuar atë që e ka cilësuar si plagën e madhe që kemi si pasojë e një sistemi të kalbur dhe të korruptuar të drejtësisë në vend, që dhunuesit e grave i shpall të pafajshëm.
“Dy fjalë lidhur me momentin ku jemi për ditët e fushatës kundër dhunës ndaj grave. Pa dashur të marrë kohë me fjalët e përgjithshme dua të theksoj se edhe në këtë aspekt përsëri plaga e madhe e krijuar nga një sistem drejtësie i kalbur dhe korruptuar prek direkt integritetin fizik dhe dinjitetin e grave. Janë rrëqethëse dhe jo të pakta rastet kur dhuna ndaj grave ka kaluar mes sallës së gjyqit dhe dhunuesit janë shpallur të pafajshëm. Ashtu sikundër janë rrëqethëse rastet e përsëritjes së dhunës nga të njëjtë persona që kanë dalë të pafajshëm para gjyqit dhe janë rikthyer në sallën e gjyqit si dhunues përsëritës” - tha Rama.
Sipas kreut të qeverisë, ky është një aspekt që prek të drejtën në këtë vend do të adresohet me siguri me më shumë drejtësi nga sistemi i ri i drejtësisë.
Ndërkohë, sipas Ramës, Ministria e drejtësisë dhe specialistët janë angazhuar për të rishikuar legjislacionin dhe për të ndërmarrë një hap domethënës në adresimin e dhunës ndaj grave, jo në aspektin e masave por edhe në aspektin e mbështetjes ndaj tyre.
“Ministria e Drejtësisë me ekipin e saj janë duke përgatitur projektin e një amnistie të fundvitit që do të adresojë në radhë të parë nevojën për të lehtësuar gratë e dënuara dhe më të moshuarit bashkë me to”- tha ai.
