E gjitha nisi për këngën e vjetra të Swift. Me pak fjalë, Taylor e la “Big Machine Records” këtë vit, ku kishte regjistuar 6 albumet e saj të parë dhe menaxheri Scooter Braun e bleu, duke zotëruar kështu të drejtat për pjesën më të madhe të këngëve të saj. Taylor nuk ishte e lumtur për këtë, sidomos për faktin që ishte përpjekur që t’i blinte këngët e veta, pra t’i kishte në zotërimin e saj. Megjithatë konflikti mes tyre kishte “rrënjë” të thella, duke qenë se Braun akuzohej nga Swift për bullizëm dhe që gjatë gjithë karrierës së saj ky njeri ishte përpjekur që t’i bënte keq.
Më pas, në 14 nëntor, me anë të një postimi në Tumblr, me titullin “Nuk di çfarë tjetër të bëj”, Taylor tregonte se Scooter dhe CEO i Big Machine, Scott Borchetta, e kishin ndaluar që të luante këngët e saj më të suksesshme në ceremoninë e AMAs, ku do të merrte çmimin si “Artisti i Dekadës”. Madje ajo tha se Netflix kishte bërë një dokumentar për karrierën e saj, por Scott dhe Scooter kanë kundërshtuar përdorimin e muzikës që ata zotërojnë në këtë projekt.
Në të njejtën ditë që kjo deklaratë u bë, përfaqësuesi i Taylor, Tree Paine, bëri një prenoncim në emër të artistes, ku sërish i mëshoi faktit që kompania ja ndalonte asaj t’i luante këngët e vjetra në eventin e rëndësishëm të AMAs. Dhe për sa i përket pjesës së parave, ajo u shpreh se në fakt Big Machine duhet t’i paguante Taylor 7.9 milionë dollarë, pra ata i kishin borxh dhe jo e kundërta. Gjatë gjithë kësaj kohe, si vetë këngëtarja, po ashtu dhe ekipi i saj kanë bërë thirrje që fansat apo personat që e ndjekin, t’i shprehin ndjenjat apo gjithë zemërimin Scooter Braun-it apo Scott Borchett-ës, pa u kursyer, detaj që do na duhet pak më vonë.
Dhe u deshën pak ditë, por drejtësia erdhi në vend! Taylor zyrtarisht u lejua që të këndonte hitet e saj më të mëdha gjatë performancës që do të japë në AMAs fundjavën tjetër. Por ky fakt nuk i ka zgjidhur konfliktet mes këngëtares dhe menaxherëve. Pas shumë muajsh përmendje në këtë çeshtje, Scotter Braun më në fund u shpreh me anë të kompanisë së tij të enjten, ku njoftonte që gjithçka kishte ardhur për shkak të mos komunikimit. Dhe ditën e djeshme, ai reagoi në profilin e tij të Instagram-it, ku në një kërkesë drejtuar Swift, ndër të tjera tregonte se po fliste publikisht për shkak se fëmijët e tij kishin marrë kërcënime për vdekje.
