I radhës që mbërriti sot në zyrën e Ilir Metës, ishte Bamir Topi. Kriza kushtetuese ka mbërthyer politikën, duke risjellë edhe njëherë përplasjet e ashpra mes Qeverisë dhe Presidencës, për plotësimin e vakancës me gjyqtarë, gjë që do bënte të mundur bërjen e saj funksionale.
Ish-presidenti tha se takimi me Metën u zhvillua brenda parametrave të logjikës politike dhe juridike. Sipas Topit, e gjithë kriza politike është pasojë e 21 prillit 2008.
“Ajo që mund të them sot është se sot jemi në nëntor 2019 do e kem të vështirë të flisja nëse nuk do kisha luftuar në prill 2008. Kjo e sotmja është pasojë e 21 prillit 2008. Sot historia e përplasjeve institucionale është një histori e trishtë, është përplasja më e paprecedentë. I gjithë ai pushtet që ndryshoi në 2008 dezikulibroi mënyrën e sjelljes politike. Kush bëhet kryeministër marr pushtet, edhe kur shkojnë në parlament është pushtet i kryeministrit. Por në fakt në një shet modern duhet të ketë balancë të institucioneve. Pas 2008 ky institucion është kthyer në atavik, i parëndësishëm. Palët që janë në këtë përplasje duhet që të gjejnë arsyen dhe vullnetin për ti dhënë një zgjidhje, që nuk është e pushtetit personal të njeriut”, tha Topi.
I pyetur nëse do ta shpërndante Parlamentin, Topi tha: “Unë besoj se nuk është në vullnetin e cilido individ sepse në kushtetutë është e qartësuar. Janë 3 raste kur parlamenti mund të shpërndahet. Kur një qeveri nuk formohet, por janë edhe dy rrethana të tjera që nuk kanë të bëjnë me situatën që kemi sot”.
