Një polemikë e re, që ka në qendër liderin e PD, ka lindur ditët e fundit. Lulzim Basha po akuzohet se është zhvendosur për të banuar në vilën e njërit prej atyre që e ka akuzuar si oligark i Edi Ramës. Në këtë polemikë ka disa të vërteta, disa ekzagjerime dhe disa mistere.
Në fillim, në disa media kritike me Bashën, u përhap një lajm në formë quizi. Pak a shumë aty theksohej se në mënyrë të çuditshme PD i ka ndërprerë prej një viti sulmet kundër biznesmenit Agron Papuli, të cilin opozita e pati denoncuar më parë si përfitues të pushtetit të Edi Ramës. Aty shkruhej pak a shumë ky tekst:
"Në atë kohë PD ishte mjaft e ashpër, por diçka ndodhi… Askush nuk po flet më për Agron Papulin, njeriun e Edi Ramësn, ortakun e tij, familjarin e tij që qeveria dje i jepte 20 milion euro. Çuditërisht në PD ka rënë heshtja, nuk ka më konferenca shtypi kundër Papulit, siç përfliten shumë nga emrat e biznesmenëve që janë të afërt me qeverinë dhe që Basha dhe Republika e Re i quajnë “ortakë të Kryeministrit”.
Dhe në disa nga mediat, që shpërndanë pak a shumë të njëjtin tekst të të njëjtit lajm, hidhej dhe dorashka e sfidës: në ditët e ardhshme do shpjegohet edhe përseja e kësaj heshtjeje. Atë e zbuloi në fillimin e kësaj jave Dritare.net. Sipas saj, kryetari i Partisë Demokratike, Lulzim Basha ishte zhvendosur nga apartamenti i tij në katin e 12, pranë kullave te “Qemal Stafa”.
Burimet e kësaj mediaje treguan se Basha dhe familja e tij janë shpërngulur, që prej javës së kaluar, në kompleksin e vilave “Long Hill”, në periferi të Tiranës.
Dritare tregoi se Basha tani jeton në një vilë dykatëshe të kompleksit nga më të pëlqyerit në kryeqytet, i njohur si kompleksi i vilave të Papulit. Madje në ilustrim të lajmit u tregua dhe një foto ku shihet automjeti i Bashës duke hyrë në “Long Hill" duke thënë se janë shtuar rojet e sigurisë së kryedemokratit.
"Nuk dihet nëse Basha e ka blerë vilën apo banon përkohësisht në pronën e ndërtuesit Papuli", thuhej në tekstin e botuar. Pra theksi i lajmit, që dukej si i dirigjuar nga një dorë, nuk qe blerja apo qeraja, por zhvendosja e Bashës në rezidencën e Papulit.
E vënë në presion nga përmasat që mori ky lajm, selia e PD vendosi të reagojë. Sipas PD-së banesa aktuale e zotit Basha do të duhet t’i nënshtrohet disa punimeve të domosdoshme, pasi është dëmtuar nga tërmeti.
“Ne disa media eshte shperndare nje dezinformim i qellimshem lidhur me banesen e kryetarit te PD Lulzim Basha. Pas disa demeve te shkaktuara nga termeti, banesa e zotit Basha do te duhet t’i nenshtrohet disa punimeve te domosdoshme.
Per kete arsye zoti Basha dhe familja e tij jane zhvendosur perkohesisht ne nje banese me qera, qe nuk ka asnje lidhje me fotot e rreme te shperndara nga disa portale te kontrolluara nga qeveria. Banesa me qera e familjes se zotit Basha jo vetem nuk ka pishine, por eshte me e vogel sesa banesa e tij ne rindertim.
Gjithcka tjeter eshte trillim i sponsorizuar nga qeveria.”– njofton PD.
Pra, PD u përgjigj për blerjen, pishinën, tërmetin, por ajo nuk i dha përgjigje vetëm akuzës fillestare, të ngritur në këmbë me kujdes nga makineria e propagandës së kundërshtarëve të saj. Pse Basha u zhvendos tek rezidenca e biznesmenit që e pati akuzuar dhe pse ka kohë që PD i ka pushuar sulmet ndaj tij. Në thelb ky scoop, që është gatuar në zyrat e Rilindjes, i ngjan asaj sekuencës kur Rama e akuzonte Bashën në kuvend për emrat e oligarkëve të përbashkët dhe ky i fundit në vend që të përgjigjej, thjeshtë ulte kokën.
©Lapsi.al
