Reperi i njohur Eminem është marrë në pyetje nga Shërbimi Sekret amerikan, për shkak të disa vargjeve të tij të konsideruara “të dhunshme”, që kanë lidhje me vajzën e presidentit Donald Trump, Ivanka Trump.
Eminem publikoi në 2017-ën një këngë të titulluar “Framed” , ku ndër të tjera shprehet: “Si dreqin Ivanka Trump ndodhet në bagazhin e makinës sime?” Ai më pas e quan atë një “bjonde e vogël budallaqe” dhe thotë se atë e hodhën në një pellg.
Kënga tjetër në shqyrtim, “The Storm”, është një sulm i vërtetë kundër presidentit amerikan. Ai nënvizon se si Trump nxit urrejtjen mes njerëzve dhe përpiqet të shpërqendrojë amerikanët nga çështje të rëndësishme, siç është tregtia e armëve, duke sjellë vëmendjen në tema joserioze dhe sekondare. Mediat e huaja shkruajnë se agjentët e vizituan reperin dhe e intervistuan në janar të vitit 2018, por ndaj tij nuk u mor asnjë veprim tjetër.
