Emina Çunmulaj është një ndër modelet më të njohura e të suksesshme shqiptare, e cila prej vitesh jeton në Shtetet e Bashkuara të Amerikës.
Ajo ka ndërtuar jetën e saj dhe është shumë e lumtur pranë bashkëshortit dhe dy vajzave të tyre.
Në rrjete sociale, Emina ndan me ndjekësit momente të ndryshme nga përditshmëria dhe duket e plotësuar në çdo aspekt.
Mirëpo, e vetmja që i mungon modeles është nëna e saj, të cilën e humbi gjashtë vite më parë.
Megjithëse ka kaluar kohë, asaj i peshon njësoj mungesa e saj dhe këtë e ka shprehur në një status të gjatë në Instastory, që na i mbushi sytë me lot.
“Thjesht mësova ta vazhdoj jetën pa ty, nuk e di si. Ndonjëherë mendoj sikur je thjesht në një vend tjetër të botës dhe do të të shoh së shpejti. Herë të tjera dëgjoj zërin tënd në regjistrime dhe mendoj se je sërish diku dhe do të të takoj sërish. Por ndonjëherë thjesht qaj sepse e di që s’do të mundem të të përqafoj më dhe ti s’do t’i takosh kurrë vajzat e mia, tek të cilat të shoh shpesh ty. Ndonjëherë ndjej se ti je kudo përreth meje dhe oh, sa do të doja të më shikoje! E di që do të ishe krenare se sa nënë e mirë jam për vajzat e mia. E kam mësuar gjithçka nga ty. Më mungon kaq shumë mami! S’më besohet që kanë kaluar 6 vite, duket sikur ndodhi dje!”- shkruan Emina në postim.
