“Koka ty ta boni” ishte pa pikën e dyshimit një nga këngët “hit” të kësaj vere që lamë pas. Për hir të së vërtetës, çdo bashkëpunim i këngëtares së mirënjohur të muzikës popullore, Artjola Toska, ka patur garancinë e suksesit, fill pasi ka parë “dritën” e publikimit, për më tepër në vjetët e fundit, kur falë lehtësirave të zhvillimit teknologjik, këngët aksesohen lehtësisht kurdoherë në gjigandin e përmbajtjeve filmike, “Youtube”.
Ky bashkëpunim në të vërtetë përbën një risi në skenën shqiptare. Ndryshe nga më parë, bëhet fjalë për një “hit” me 5 kontributorë, Toskën dhe katërshen e “Magic4”, të përbërë nga vëllezërit Marsel dhe Frensi Zadrima, së bashku me bashkëshortet respektive, bukuroshet Entela dhe Vanina. Dhe jo vetëm kaq! “Puzzle”-i i “Koka ty ta boni” do të ishte i paplotë pa përmendjen e kantautorit të famshëm, Pirro Çako, i cili është kompozitori dhe tekstshkruesi i këngës.
Prej majit, kur kjo këngë me motive folku bëri xhiron e rrjetit dhe deri më tani, janë korrur rreth 4 milionë klikime. Vlen për t’u përmendur se katërshja e “Magic4” ka realizuar edhe një bashkëpunim të mëparshëm, këngën e titulluar “Aisha Dashnia”, me një tjetër këngëtar shumë të dashur për mbarë audiencën shqiptare, Sabri Fejzullahun.
https://www.youtube.com/watch?v=I7mRoAeWuqY
